Allen, die disen brief sehent oder ho^erent lesen, kv´nden wir her Johs. von Sternegge¹ ein ritter, Johs. von Langen||hart² vnd Burchart der Peijerer³ vnd veriechen offenlich alle drije vnd ieclicher besvnder mit disem gegenwúrtigen brieue, || daz wir dez burgermeisters, . . der retten vnd der burger gemeinlich von Zúrich recht vnd getrúwe diener worden sint || hinnan ze den nehsten wiehennehten, so nu koment, vnd dannan hin v´ber daz nehst gantz jar an alle geverde, vnd haben wir o^vch alle drije vnd ieclicher sunderlich gelert eide zů den heiligen gesworn, den vorgenanten burgern Zúrich ze wartenne geraten vnd behulfen ze sin an allen stetten, da si vnser bedurfen oder notdurftig sint. Were aber, daz si vns alle drije ald vnser keinen sunderlich besanten, dem oder dien sv´ln si alle die wile, so si in ir dienst sint, verkosten, als in nutzlich were vnd den selben von Zúrich erlich. Were o^vch, daz wir alle drije ald dekeine sunderlich rosse alder hengste verlure in der stat dienst vnd sich dez der burgermeister Zúrich, der ze den ziten meister ist, erkande, daz man vns die verlust billich gelten solte vnd in der burger dienst verloren were, so sol man vns och gelten, als sich danne der selb burgermeister erkennet, waz man vns da fur geben súlle, vnd wez sich der burgermeister her vmb erkennet, ob man vns gelten sv´lle oder nicht, dez sol vns alle drije ald ieglichem besvnder wol benu^egen. Were o^vch, daz wir alle drije ald dekeine svnderlich sto^esse oder missehellung gewunnen mit den burgern von Zúrich, ez were von verluste, so wir in ir dienste verluren, ald von keinen andern sto^essen wegen, daz han wir ietze alle drije vnd ieglicher svnderlich gesetzet vf den burgermeister, der ze den ziten burgermeister ist, also daz er vnser rede verho^er vnd innemme vnd der burger von Zúrich widerrede, vnd wez sich danne der burgermeister erkennet vnd vsseit, daz sol vns alle drije vnd ieglichen besvnder wol benu^egen vnd daz stêtte halten mit gůten trúwen vnd enkein ansprache an den rate noch an die burger von Zúrich fúrbaz dar vmbe niemer me erhaben. O^vch haben wir gelo^vbt bi dem eide, so wir gesworn han, . . dem^a) burgermeister . . die rete vnd die burger gemeinlich von Zúrich ze warnen, ob ir^a) icht horten, daz in schedelich mo^echte wesen. Man sol o^vch svnderlich wissen, daz wir alle drije vnd ieglicher svnderlich dez soldes vnd dez geltes, so vns der burgermeister die rete vnd die burger von Zúrich vmb vnsern dienst vsrichten solten, gar vnd gantzlich vsgericht vnd gewert sint, vnd sagent dar vmb den burgermeister . . den rat vnd die burger gemeinlich von Zúrich vnd ir nach koment fúr vns vnd fúr vnser aller erbe dez geltes gar vnd gantzlich vnd ledig vnd lose. Vnd her v´ber ze vrkúnd, daz diz allez war vnd stette belibe, so hat vnser ieglicher sin ingsigel offenlich genhenket an disen brief. Diz geschach Zúrich an dem nehsten samstag vor sant Martis tag in dem jare, do man von gottes geburt zalte druzehen hundert vnd vierzig jar vnd dar nach in dem nv´nden jare.

Source Fulltext: Chartularium Sangallense VII, Nr. 4149, S. 74.