Allen, die disen gegenwúrtigen brief ansehent alder ho^erent lesen, kvnde ich Hainrich in der Búnde burger ze Costentz || vnd vergihe des offenlich mit disem brief, daz ich den frômen wisen luten den burgern vnd der stat gemainlich ze || sant Gallen gelobt hab vnd hant mit mir mit gůten trúwen gelobt her Johans von Haidelberg¹ ritter, V^olrich in der Búnde || der elter vnd Cv^onrat Pfefferhart der elter burger ze Costentz also, wa^er daz Johans Efrid von sant Gallen der kramer, der min vogtman ist vnd den si geuangen hattent, nv^ ald hernach îemer v´t ta^et wider die selben stat vnd die burger ze sant Gallen, das sol mir vnd den selben hern Johansen von Haidelberg, V^olrichen in der Búnde vnd Cv^onrat Pfefferhart, die durh min bette darvmb gelobt hant, den sol es allen vnd och v´nser iegelichem svnderlich als lait sin, als ob er es wider v´ns ta^et vnd getân het. Vnd dez ze warem vnd offeme vrkv´nd gib ich der selbe Hainrich in der Búnde min insigel an disen brief. Darnach vergehen wir die selben Johans von Haidelberg, V^olrich in der Búnde vnde Cv^onrat Pfefferhart, das wir durch bette des selben Hainrichs in der Búnde die selben gelúbd willeclich getân haben, als vor ist beschaiden. Vnd dez zainer warhait haben wir och alle drye v´nserv´ insigel gehenket an disen brief. Der ist ze Costentz geben, do man von Cristes gebúrte zalte drv´zehenhvndert jar, darnach in dem ain vnd ffv´nfzigosten jar, an dem nehsten samstag nach inga^entem mertzen.

Source Fulltext: Chartularium Sangallense VII, Nr. 4204, S. 117.