Allen den, die disen brief an sehent oder ho^erent lesen, kúnd ich Andres von Marmles¹ vnd V^olrich || Manús² vnd vergehent des offenlich an disem brief, daz wir v´ns an v´nsrer elichen wirtennen fro Annen || vnd Nesen Symans sailgen Straiffes tohteran stat mit Johansen, Otten, Albrehten vnd Elsbeten³ iren elichen || geswistergitten willeklich vnd gern mit gůter vorbetrahtung entzigen haben vnd verzihent mit disem brief alles des rehten vnd ansprach, so wir oder v´nser erben iemer zů der burg oder an die burg ze Kaphenstain⁴ vnd den zwain stadeln, so dar zů ho^eret, vnd zů den akkern, so der edel herr herr Donat sailig von Fatz⁵ zů der selben burg gelihen hatte, vnd hant dar vmb mit den obgenanten Johansen, Ôtten, Albrehten vnd Elsbeten von der edelen frowen fro Kúngunt von Fatz gra^efin von Tockenburg⁶ vierzig Curwa^elscher marken⁷ enphangen. Wir hant och gelobt, diser ding wer ze sinne an gaischlichem vnd an weltlichem geriht nah reht, wa sin der edel v´nser gna^ediger herr graf Ffriderich von Tockenburg⁸ oder sin erben notdurftig sint. Vnd des ze warem vnd offem vrkúnd aller diser ding so henkent wir die obgenanten Andres von Marmles vnd V^olrich Manús v´nserú aigen insigel offenlich an disen brief. Dar nah vergehent wir die obgeschriben Johans, Ôtte, Albreht vnd Elsbet, daz wir v´ns och entzigen habint vnd verzihent mit disem brief alles rehten vnd ansprach, so wir zů den obgenanten burg vnd gu^etern hatten, in aller wis, als vorgeschriben^a) ist. Ich der obgenant Johans Straif hab och gelobt, wer ze sinne diser ding fur mich vnd minú geswistergit, vnd daz alles daz war ist, daz an disem brief von v´ns geschriben ist, vnd stait belib, so bindent wir die obgenanten Joh., Ôtto, Albr. vnd Elsbet v´ns vnder Andres von Marmles vnd V^olriches Manús insigel^b), won wir aigener insigel nút enhabent, es alles stait ze halten. Dis beschah vnd ward [o]ch^c) dirr brief geben ze Kúblins⁹, do man zalt von gottes gebúrt drúzehenhundert jar, dar nah in dem ainvndfunftzgosten jar, ze inga^endem aberellen.

Source Fulltext: Chartularium Sangallense VII, Nr. 4212, S. 123-124.