Wir Wilhalm vnd Hug vnd Hainrich vnd V^olrich gebrüeder graue von Montfort genannt von Bregentz¹ thüen khundt alle vier gemainlich vnd vnuerschaidenlich mit offner vergicht allen den, die disen gegenwúrtigen brieff ansechent, lesent oder ho^erent lesen, das wir alle vier gebrüeder vorgenemten wilklich vnd dur besserung vnd auch recht vnd redelich ze kauffen habin gen dien beschaidenen gebrüeder V^otzen vnd Dietrichen vnd Johansen dien Werchmaistern, Kunen sa^eligen so^en des Werckhmaisters burger ze Wanngen² vnd ir erben, ob sie enwa^erin, vnnsern thail des gutz ze Schwartzensee³ vnd was darzu ho^errt, den sedel vnd den see, der da ist, vnd die zwen ho^eff ze Schwartzensee vnd die zwen hoff zem Adelguntz⁴ vnd ain hoff zum Hergers⁵ vnd dis wiß, die man nemtt zum Wiger, vnd was vnnserm vatter seligen zetail wart, solichs^a)e sa^elgun gutts des Schlaichs, dis alls han wir inen gen fúr ain recht lechen von sannt Gallen, vnd wann wir auch inen das selbe lechen nit habin gefertiget von demselben lechenherren, so sollen wir vorgenemten grauen alle vier vnuerschaidenlich vnd vnnser erben, ob wir enwa^erin, der vorgenemten Werchmaistern vnd ir erben, ob sú enwa^erin, des vorgenemten lechens getrewe tra^eger sein, alle die weile vnd wir oder vnnser erben es inen oder iro erben nit gerfertigot habin, vnd so^ellin och oder vnnser erben iro oder iro erben des vorgenemten gutts deß lechens recht wern sein nach lechens recht, dasselbe lechen sey gefertget oder nit. Wir vorgenemten gebrüeder grauen von Montfort haben auch gen zekauffen fúr ain recht aigen dien vorgenemten Werchmaistern gebrüedern vnd ir erben die zwen ho^eff zem Hezmans⁶ vnd ze Schwartzensee, den se halben, der in die selben ho^eff hort halber, des han wir inen gen nach aigens recht vnd sollin auch vnd vnnser erben iro vnd ir erben desselben aigens vorgenemts recht wern sein nach aigens recht, vnd haben inen auch dis als gen, das hie vor beschaiden ist, es sey lechen oder aigen, mit holtz, mit velde, mit waide, mit ackhern, mit wißen, mit zwi, mit wasserflissen, mit allen rechten vnd mit aller zugeho^ert gesuocht vnd vngesuocht, wie es genannt ist, von recht ald von gewonhait, das han wir inen vnd ir erben, ob sie enwa^erin, allß gen vmb viertzig pfundt vnd hundert pfundt pfennig guotter vnd genemer Costantzer mu^entz, der wir aller gar vnd genntzlich von inen seien vericht vnd gewert. Wir vorgenemte gebrüeder graue von Montfort verzeichen vnns vnd geben auff fúr vnns vnd vnnser erben des vorgenemten guotts alls, es sey lechen oder aigen, gen dien vorgenemten gebrüedern den Werchmaistern vnd ir erben, ob sie enwa^eren, aller recht, aller vorderung, aller ansprach, so wir oder vnnser erben darzu ha^ettent oder gehan mo^echtent, an welichem^b) gericht vnd an gaistlichem vnd an allen stetten. Vnnd ze aim offen vrkhúnde ainer sicherhait vnd ainer warhait alls des, so hie an disem brieff geschriben statt, geben wir vorgenemten Wilnhm. vnd Hug vnd Hainrich vnd V^olrich gebrüeder graue von Montfort fúr vnns vnnd vnnser erben den vorgenemten V^otzen vnd Dietrichen vnd Johansen gebrüeder den Werchmaistern vnd ir erben disen brieff besigelten vnnser ieschelicher besonnder mit seim aigen innsigel. Vnd wart dine^c) brief gen ze Bregentz⁷, do man zalt von gotts geburt dreyzechenhundert jar vnd in^d) aim vnd fúnffzigisten jar, an dem mentag dem ersten ze eingendem aberêllen.

Source Fulltext: Chartularium Sangallense VII, Nr. 4213, S. 124-125.