Allen den, die disen brief ansehent, lesent oder ho^erent lesen, tu^en wir swo^ester Katherina priorin vnd die frowan gemainlich des conuen||tes in der vorstat ze sant Gallen¹ kunt vnd veriehent des offenlich an disem brief, das wir mit ainhellem rât vnd gůter betrahtunge des ersamen || in got brůder Hainrichs des prior der Bredier conuentz ze Costentz² vnd ander erber beschaidern lút phaffen vnd layen vnd v´nser || frúnd ze rat sint worden, won v´nser conuent als kumberhaft ist vnd also gro^eslich an schaden lit, das wir verko^vft habin vnd verkôffent mit disem brieue dem spital ze sant Gallen³, da die siechen lút inne ligent, vnd den armen lúten an dem Linsibu^el⁴ vnd iren nachkomen reht vnd redlich frilich vnd vmbetwngellich den hof halben ze Fru^ewille⁵, der v´nser reht aigen was vnd des êgenemten spitales vnd der armen lúten an dem Linsibu^el ôch halbe, mit aller zůgeho^erde vnd nútzen, so wir da hatten vnd zů dem selben halbtail gehorten, ze haben vnd ze niessen eweklich vnd da mit ze tu^enne, was in vnd iren nachkomen nútzlich ist, also haben wir den selben hof halben, der v´nser was, verko^vft vmb fúnfzehen pfunt pfenning gůter vnd ga^eber Costentzer múnse, der wir gantzlich gewert sint vnd sú an v´nsers conuentes schinbern nútz bekert habint an den stetten, da wir grossen schaden mit verkomen hant. Wir veriehent ôch, das wir den vorgeschriben hof halben dem êgenemten spital vnd den armen lúten an dem Linsibu^el mit des vorgenemten priors gunst willen vnd verhengde vnd helf vff geben vnd geuertgot hant, als es kraft moht vnd solt han vnd als wir v´nser aigen gůt von reht vertgon sont, vnd bindent v´ns ân allen schirm, das wir den vorgenemten spital vnd die armen lút an dem Linsibu^el versprechen vnd entrihen sont vmb den vorgenemten hof halben, der v´nser was, vnd reht wern darumb ze sinne gen menlichem an gaistlichem vnd an weltlichem geriht vnd wa es in nôtdurftig ist, vnd ob wir das niht ta^etin, so bindent wir v´ns vnd v´nser nachkomen, den schaden, in den der vorgenemt spital vnd die armen lút an dem Linsibu^el hieuon ka^emint, das wir inen den selben schaden gantzlich ablegen sont, vnd sol v´ns hieuor gaistlich noch weltlich reht noch enhain sach schirmen. Hierúber haben wir v´ns entzigen vnd entzihent v´ns mit disem brieue aller frihait, alles rechten, aller gesetztan vnd alles des, da mit der vorgeschriben kôf von v´ns ald von ieman von v´nseren wegen bekrenkt mo^eht werden oder da mit wir wider gesetzt mo^ehtint werden in nútzlich gewer des vorgeschriben halben houes, den wir verko^vft habin, ald das wir sprechen mo^ehtin oder vsziehen, das geuârlich vnd mit vntrúwen an dem ko^vf mit v´ns geworben vnd vmbgangen wa^er, vnd aller der schirm vnd fúrzugen, die wir gehan mo^ehten von dehainen rehten vnd frihaiten, da mit der vorgenemt ko^vf in dehain wis wider braht mo^eht werden. Wir wellent ôch, daz das gemain entzihen, so wir vmb den vorgeschriben ko^vf an disem brief getân haben, als gůt kraft hab, als es von v´nser ieglichen sunderlich beschehen wa^er. Vnd ze ainer merer sicherhait aller der vorgeschriben sachen so haben wir v´nsers conuentes insigel gehenkt an disen brief. Ich der vorgenemt brůder Hainrich der prior vergich offenlich mit disem brieue, das ich ôch min insigel gehenkt han an disen brieue ze ainem offen vrkúnd aller der vorgeschriben sachen, das die mit minem willen gunst vnd verhengen beschehen vnd vollefu^ert sint. Der geben ist ze sant Gallen, do man zalt von gottes gebúrt drúzehenhundert jar, fúnfzig iar, dar nach in dem ersten jare, an dem na^ehsten samstag vor sant Jacobs tag in dem ho^ewat.

Source Fulltext: Chartularium Sangallense VII, Nr. 4224, S. 134-135.