Wir Heinr. von gottes genaden abt vnd daz capittel gemeinlich des gotzhus zen Einsidellen¹ sant Ben(edicten) ordens in || Costenzer bystům kunden allen, die disen brief sehend oder ho^erend lesen, vnd vergehen offenlich, daz wir mit || gůtem râte vnd vorbetrachttug^a) vnser der obgenanten herren dez vorgescriben capittels an gesehen haben die nûtz||beren vnd willigen dienste, so vns vnd vnserm gotzhus dike vnd vil beschehen sind von dem wolerbornen herren vnd vnserm lieben o^ehan graf Fridericht^a) von Toggenburg², vnd haben im durch siner ernsthaftter bette willen die fro^vwen, die man nemmet Elisabet Steinera, Hermans Schultheissen von V^tznach³ eliche wirtenn, die vns vnd vnser gotzhus von eigenschaft des libes angeho^ert, lidig vnd loss haben gelassen mit^b) aller eigenschaft dem obgenanten vnserm ohan graf Friderich vnd sinen nachkomen mit allen den kinden, so si hinnanhin nach dem tag, als dir brief gen ist, bi dem obgenanten Herman oder andern^c) ir elichen wirtten gewinnet, ob dir stúrbe vnd si ein andern nême, der kinden wir vns o^vch gentzl(ich) verzihend mit disem brief fúr vns vnd vnsers gotzhus nachkomen mit aller ansprach friheit vnd ehaftti, so wir iemer dekeine nach eigenschaft^d) der obgenanten fro^vwen fron Elisabet vnd ir kinden gewinnen mo^echtten an geistlichen oder an weltlichen gerichtten, an alle geverde. Vnd dez ze einem waren offem vrkúnde alles des^e), so vor gescriben ist, haben wir der vorgenant abt Heinr. vnd dz capittel fúr vns vnd vnsers gotzhus nachkomen, die wir vestenklich hie zů binden^f), vnser ingesigel offenlich gehenket an disen brief. Der geben ist an dem nechsten zinstag nach sant Johans tag ze sungechtten, do man zalt von gottes geburt drúzehen hundert jar vnd dar nach in dem ein vnd fúnfzigesten jare.

Source Fulltext: Chartularium Sangallense VII, Nr. 4223, S. 133-134.