Allen, die disen brieff an sehent oder ho^errent lesen, kúnd ich Johans von Heydelberg¹ ritter vnd vergich offenlich an disem brieff, das ich mit gůter vorbetrachtung nach miner gůten frúnd vnd ander erber lút râte minem lieben o^vhem V^olrichen in der Búnd vogt ze Costentz² vnd allen sinen erben hab ze kouffen geben recht vnd redlich minen hoff ze Sorendal³ vnd was dar zů ho^ert mit wasen mit zwy mit weid mit holtz mit veld mit wisen mit akern mit stegen mit wegen mit abwegen mit wasser mit wasserleytinen mit allen nútzen vnd gewonheiten vnd mit allen rechten gesůchtz vnd vngesůchts benemptz vnd vnbenemptz wissentz vnd vnwissentz, als der selb hoff an mich komen vnd bracht ist vnd als ich in gehebt vnd genossen hab her vntz an disen húttigen tag, also hab ich im den selben hoff mit aller zůgehord fúr recht eigen ze kouffen geben vmb drú vnd fúnffzig pfund pfenning gůter Costentzer múntze, der ich gantz bezalt bin, vnd sind in minen gůten nutz komen, vnd hab im ouch den selben hoff mit aller zůgehord fúr recht eigen vff offner des riches strass gefertgot vnd vffgeben mit allen den worten werken vnd geta^eten, so darzů hort vnd notdurfftig waren nach gewonheit vnd recht, vnd hab mich ouch verzigen vnd verzieh mich mit disem brieff fúr mich vnd min erben aller eigenschafft aller lehenschaft aller vordrung vnd ansprach alles rechten geistlichs vnd weltlichs gerichtes, da mit wir den selben hoff ze Sorental ko^endint ald mo^echtind angesprechen ald da mit diser kouff ko^end ald mo^echt in dehein wise bekrenkt ald gebrochen werden, vnd wer, das im den selben hoff jeman nu ald hernach gar ald deheinen teil ansprech fúr eigen ald fúr lehen, des sollen ich vnd min erben in vnd sin erben verstan vnd versprechen vnd ir recht weren sin fúr recht eigen nach recht ân geuerd. Vnd ze warem vrkúnd vnd sta^eter sicherheit gib ich der vorgenant Johans von Heydelberg fúr mich vnd min erben dem selben V^olrich in der Búnd vnd sinen erben darúber disen brieff gesigelten mit minem eigen insigel. Der geben ist an sant Oswaltz abend nach gotz gebúrt drútzehenhundert vnd in dem sybenvndsybentzigosten^a) jare.

Source Fulltext: Chartularium Sangallense VII, Nr. 4496, S. 347.