Wir V^olrich von Fridingen probst des gotzhuses ze sant Steffan ze Costentz vnd Peter herre ze Hewen kúndent vnd veriehin des offenlichen || mit disem brief, das wir vmb den stoss misshelli chrieg vnd ansprach, die die fromen vnd wolbeschaiden manne Johans vnd Hainrich von Staina || gebrůder von der vogthye wegen ze Harpreswile mit den erwirdigen in gott den . . chorherren vnd . . dem capitel des obgenanten gotzhuses ze sant Steffan || ze Costentz ietz lange zit gehaben hant, die si ze baiden siten willechlichen vnd vnbetwungelichen vnd mit bedahtem můt vff v´ns satzten vnd gesetzzet hant, mit der beschaidenhait vnd mit dem gedinge, was wir dar vmb spra^echin vnd vssaitin, das si das baidenthalb vt ze baiden siten eweclichen sta^et soltin haben ân alle widerrede. Vnd dar vmb so hant wir baide vntzerworfenlichen mit wolbedahtem můt vmb die vorbeschaiden vogthye ze Harpreswile gesprochen vnd vsgesait vnd sprechent vnd sagent vss mit disem brief, das die vorgenanten Johans vnd Hainrich von Staina gebrůder hinnanhin vo^egt sont sin ze Harpreswile, vnd sont lút vnd gůt da schirmen mit gůten trúwen ân alle geua^erde vor ma^enlichem als ir aigenlich gůt, vnd sont si ir erben vnd o^vch nachkomen, wer die sint, von der selben vogthye ze Harpreswile ia^erliches niht me nemen denn das alt vogtreht oder die alten vogtstúre, das ist ain mut kerne, ain malter haber Chostentzer messes, drige schilling vnd nún pfenning Costentzer múns, súben herbst hu^enre vnd súben vasnaht hu^enr, vnd sont si dar v´ber die lút ze Hapreswile mit kainen andren stúren noch diensten niht fúro bekúmberen noch bekrenken, vnd wenn die obgenanten von Staina baid oder der ain, ob der ander niht in dem land wa^eri, oder ir erben, ob si enwa^erint, oder ir nahkomen, wer die sint, von den obgenanten Chorherren vnd dem capitel ze sant Steffan ze Costentz oder von ir nachkomen mit fúnfzig guldinen gůten vnd lo^etigen ermant werdent, so sont si die vorgenanten vogthye ze Harpreswile vnuerzogenlichen vnd ân all widerrede vff geben an des bischofs ze Costentz hant, wer denn bischoff ist, vnd fu^egen, wem die selben chorherren vnd das capitel ze sant Steffan ze Costentz oder ir nahkomen wellent mit des bischoffes ze Costentz, wer der ist, handen nach allem irem willen vnd o^vch ir notdurfte. Wir habin v´ns selb o^vch das mit rehtem gedinge behalten vnd behalten v´ns das mit disem brief, wa^eri das die vorgenanten von Staina mit den vorbeschaidenen chorherren vnd dem capitel ze sant Steffan ze Costentz oder si mit inen hinnanhin von der vorbeschaiden vogthye wegen sto^essig vnd misshelig wurdint in chain wise oder wege, den selben stoss vnd misshelli sont vnd mugent wir nach v´nserm willen rihten, vnd was wir dar vmb baide vnd vnzerworfenlichen sprechent, das sont si aber ze baiden siten sta^ete haben mit gůten trúwen ane geua^erde. Vnd ze ainem offen vrkúnde aller diser vorgeschribenen dinge hant wir v´nsrú aignú insigel gehenket an disen brief. Der ist ze Costentz geben, do man zalt von gottes gebúrt drútzehenhundert jar, darnach in dem a^eht vnd fúnfzigosten jar, an dem na^ehsten samstag nach vssga^ender osterwochen.

Source Fulltext: Chartularium Sangallense VII, Nr. 4537, S. 378-379.