Allen den, die disen brieff an sechent lesend oder ho^erend lesen, kúnd ich V^olrich in der Búnd burger ze Costentz vnd vergich des offenlich an disem brieff fúr mich vnd fúr alle min erben vnd nachkomen, das ich dem vesten ritter her Johansen von Heydelberg¹ minem lieben o^ehen den hoff ze Sorendal² mit allen rechten, als ich in von dem selben her Johansen koufft³, wider ze kouffen han geben vmb drú vnd fúnffzig pfund pfenning gůter Costentzer múntz, der ich gantzlich von im gewert bin, vnd han ouch dem egenempten her Johansen den vorgenempten hoff mit allen rechten ledig gelassen vnd wider in sin hand geben vnd bracht vnd als es sitt vnd gewonlich vnd er sin notdurfftig was vnd als es von recht vnd von gewonheit krafft hatt. Darzů so han ich mich ouch gantzlich enzigen vnd enzich mich mit disem brief fúr mich vnd alle min erben gen dem egenempten her Johansen vnd gen allen den, in der hand der selb hoff von sinen wegen kunt vnd bracht wirt, alles rechten vnd aller ansprach, so ich zů dem selben hoff hatt ald mir zůgehort von eigenschafft ald von kouffes ald von gewerr ald von deheiner ander sach wegen. Vnd des ze einem offen vrkúnd vnd gantzer sicherheit so han ich der egenempt V^olrich in der Búnd min insigel fúr mich vnd alle min erben offenlich gehenkt an disen brieff. Der geben ward ze Costentz an sant Walpurgs abent in dem jar, do man zalt von gotz gebúrt drúzehenhundert vnd in dem acht vnd fúnffzigosten jare.

Source Fulltext: Chartularium Sangallense VII, Nr. 4539, S. 380.