Allen, die disen brief ansehent oder ho^erent lesen, kůnden ich Johans von Langenhart vogt¹ vnd wir der rate der statt || ze Rapreswile², das fúr v´ns kame an offen gericht Berchtolt von Witikon³, den man nemt Kale, burger ze Rapreswile mit || swester Itun von Schlatte⁴ einer closterfro^vwen ze Tennikon⁵, vro Elsbeten von Schlatte siner elicher wirtenne swester, vnd satzte || da der selbe Berchtolt von Witikon der vorgenanten swester Itun von Schlatte vf alles sin varende gůt, das er ietze het oder iemer gewinnet, ob si in v´berlebte, drije mútte kernen geltes Winterturer⁶ messes rechtes eigens also, wer den selben Berchtolt nache sinem tode an sinem va^ernden gůte, das er denne lasset, erben wil, der sol der vorgenanten swester Itun von Schlatte, ob si dennocht lebte, vsrichten vnuertzogellich drije mútt kernen geltes eigens, das si denne han vnd niessen sol ze ende ir wile ze einem rechten libding, vnd wenne si enist vnd von tode abgat, so sol das selbe kernen gelte denne des egenanten closters ze Tennikon rechte eigen sin, also mit so^elichen gedingen, das die selben drije mút kernen dannen hin e^vweklich ze des obgenanten Berchtoltz von Witikon iartzit vnd zů fro Elsbeten von Schlatte siner elicher husfro^vwen iartzit den vorgenanten clostervrowen ze Tennikon sont gân v´ber tische vmb vische vnd vmb wine, als verre si danne gelangen mugent âne geuerde, vnd weles iars si des nit ta^etent, so sol das selbe kernen gelt dannenhin ledklich vallen an den spitel ze Rapreswile⁷, vnd ist dis alles beschehen, als gericht vnd vrteile gabe vnd als v´ns vnd ander erber lúte, die dar vmbe erteilten, vf den eide důcht, das es billich kraft vnd macht hetti nu vnd hie nahe. Vnd dez alles ze einem waren offenne vrkúnde haben wir die obgenanten . . der vogte vnd der rate ze Rapreswile v´nser stat insigel nahe rechter vrteile vnd durch beider teille bette willen gehenket offenlich an disen brief. Der geben ist ze Rapreswile des iars, do man zalt von gottes gebúrt drútzehenhundert iar vnd dar nache in dem einen vnd sechtzgosten iar, an sant Gregorien abent.

Source Fulltext: Chartularium Sangallense VII, Nr. 4723, S. 530.