Ich^a) Anna von Altstetten wilont hern Hainrichs seligen tochter von Altsten^b)1 kv´nd vnd vergich offenlich an disem brief || allen den, die in sehent alder ho^erent lesen, als mich wilont min elicher wirt . . der Haiden selig von Êmz² gewizt || hat miner hainstúr, so ich im zůbracht hat, vf sin gesa^eze, da er vncz an sinen tod mit hus inne sezhaft waz || ze Êmz vf dem nidern berg, sinen keler sin hus sin ho^efstat sin wingarten sin bo^engarten sin aker sin wiza vnd waz zů der selben siner ho^efraiti von gewonhait alder von recht geho^ert, vmb ains vnd fv´nftzig pfvnd gůter vnd gna^emer pfenning Costentzer mv´ns, dú selben gu^eter ellú vnd vmb daz vorgeschriben gůt alles hat Go^ezwin von Êmz Růdolfs seligen svn von Êmz von mir gelo^ezt vnd hat mich dez gantzlich gewert, dez mich benv^egt, vnd entzieh mich fúr mich vnd alle min erben an der selben pfantschaft der vorgeschribenn gu^eter aller recht vordrung vnd ansprach gen im vnd allen sinen erben vnd nachkomen vnd aller v´nser recht gaistlichs vnd weltlichs gerichts. Vnd dez ze vrkv´nd der warhait vnd sta^eter ewiger sicherhait han ich obgenantú Anna von Altstetten disen brief geben vnd gebetten besigeln mit baider miner bru^eder insigel Hainrichs vnd Walthers von Altstetten³, wan ich aigens insigels nit han, vnder dú selben insigel ich mich bind sta^et ze hant alles, daz hie vor von mir geschriben stat an disem brief, dú selben v´nserú insigel wir baid gebru^eder Hainrich vnd Walther von Altstetten durch bett v´nser obgenanten swester vnd och ze vrkv´nd dirr sach gehenkt habint an disen brief. Der geben ist ze Altstetten in dem jar, do man zalt von Cristes gebúrt drúzehenhvndert jar vnd darnach in dem drú vnd sechtzigestem jar, an dem nechsten ma^entag nach dem svnnentag in der vasten, so man singet Judica.

Source Fulltext: Chartularium Sangallense VIII, Nr. 4863, S. 73-74.