Dilectis filiis . . sancti Galli¹ et . . in Salem² Constantiensis diocesis monasteriorum abbatibus ac . . preposito ecclesie Constantiensis³ salutem etc. Laudabilia probitatis ac virtutum merita, super quibus dilectus filius Hugo dictus Nahtram^a) presbiter perpetuus beneficiatus in ecclesia sancti Magni⁴ Constantiensis diocesis fidedigno apud nos commendatur testimonio, nos inducunt, ut sibi reddamur ad gratiam liberales. Cum itaque, sicut accepimus, parrochialis ecclesia in Willa⁵ et Turbental⁶ dicte diocesis ex eo vacante ad presens, quod dilectus filius Johannes de^b) Kalchofen⁷ olim ipsius ecclesie rector dictam ecclesiam tunc vacantem canonice sibi collatam assecutus ipsam pacifice possidens^c) se non fecit infra annum a tempore assecutionis huiusmodi cessante impedimento legitimo et dispensatione canonica super hoc non^d) obtenta, ad sacerdotium promoveri et tanto tempore vacaverit, quod eins collatio iuxta Lateranensis statuta concilii⁸ est ad sedem apostolicam legitime devoluta, nos volentes dicte^e) Hugoni premissorum suorum meritorum intuitu gratiam facere specialem, discretioni vestre per apostolica scripta mandamus, quatinus vos vel duo aut unus vestrum per vos vel alium seu alios, si^f) vocatis dicto Johanne, qui dictam ecclesiam detinet occupanti, et aliis evocandis premissa reppereritis veritate fulsiri, dictam ecclesiam, cuius fructus redditus et proventus septem marcharum argenti secundum communem estimationem valorem annuum, ut asseritur, non excedunt, dummodo tempore datarum presentium non sit in ea alicui specialiter ius quesitum, eidem Hugoni auctoritate nostra conferre et assignare curetis, inducentes eum in corporalem possessionem ecclesie ac iurium et pertinentiarum predictorum et defendentes inductum amoto exinde dicto^g) Johanne et quolibet alio illicito detentore ac facientes^h) sibi de ipsius parrochialis ecclesie fructibus redditibus proventibus iuribus et obverationibusⁱ⁾ universis integre responderi, contradictores auctoritate nostra appellatione postposita compescendo, non obstantibus, si aliqui super provisionibus sibi faciendis de parrochialibus ecclesiis vel aliis beneficiis ecclesiasticis in illis partibus speciales vel generales dicte sedis vel legatorum eius litteras impetrarint, etiam si per eas ad inhibitionem reservationem et decretum vel alias quomodolibet sit processum, quibus omnibus dictum Hugonem in assecutione dicte ecclesie volumus anteferri, sed nullum per hoc eis quoad assecutionem aliorum beneficiorum preiudicium generari, seu si venerabili fratri nostro episcopo Constantiensi vel quibus suis^k) aliis communiter vel divisim a dicta sit sede indultum, quod ad receptionem vel provisionem alicuius minime tenerentur et ad id compelli aut quod interdici suspendi vel excommunicari non possint, quodque de parrochialibus ecclesiis vel aliis beneficiis ecclesiasticis ad eorum collationem provisionem presentationem seu quamvis aliam dispositionem coniunctim vel separatim spectantibus nulli valeat provideri per litteras apostolicas non facientes plenam et expressam ac de verbo ad verbum de indulto huiusmodi mentionem, et qualibet alia dicte sedis indulgentia generali vel speciali, cuiuscumque tenoris existat, per quam presentibus non expressam vel totaliter non insertam effectus huiusmodi gratie impediri valeat quomodolibet vel differri et de qua cuiusque toto tenore habenda sit in nostris litteris mentio specialis, seu quod dictus Hugo quoddam perpetuum beneficium prebendam clericalem nuncupatum in ecclesia sancti Magni predicta, cuius fructus redditus et proventus octo librarum Turonensium⁹ parvorum summam annuam, ut asseritur, non excedunt, noscitur obtinere. Volumus autem, quod ipse, quamprimum vigore presentium dictam parrochialem ecclesiam fuerit pacifice assecutus, dictum beneficium, quod ex tunc vacare decernimus, omnino, prout ad id se sponte obtulit, dimittere teneatur, ac insuper irritum decernimus et inane, si secus super hiis a quoquam quavis auctoritate scienter vel ignoranter contigerit attemptari. Datum Auinione, VI kl. maii, pontificatus nostri anno quarto.

Source Fulltext: Chartularium Sangallense VIII, Nr. 5023, S. 212-213.