Heinricus dei gracia episcopus Constan(ciensis)¹ omnibus presencium inspectoribus subscriptorum noticiam cum salute. Noveritis, quod nos iustis certis et legittimis de causis informari volentes, an ecclesia monasterii sancti Galli vel ecclesia parrochialis sancti Laurencii apud sanctum Gallum² maior existat, super eos testes subscriptos iuratos recepimus et examinari fecimus, qui ut sequitur deposuerunt. Et primo Johannes dictus Rapp plebanus ecclesie sancti Laurencii apud sanctum Gallum predicte testis iuratus non odio non timore non prece nec precio nec favore requisitus deponit, quod ipse credat omnino ecclesiam monasterii predicti esse maiorem ecclesiam loci aput sanctum Gallum, ex eo maxime, quia non in ecclesia sancti Laurencii parrochiali sed in dicta ecclesia monasterii prefati in festo purificacionis candele, in festo palmarum palme et in vigilia festi pasce baptismum ac benedicte sunt ab antiquo, ymmo etiam ad octo dies benedictionem ipsius baptismatis inmediate sequentes pueri in loco aput sanctum Gallum baptisandi ab antiquo in eadem ecclesia monasterii sancti Galli sunt baptisati et hodie baptisantur, nec in die in parascephe aliqua divina officia in ipsa ecclesia sancti Laurencii, sed tantum in ipsa ecclesia monasterii predicti ab antiquo sunt celebrata nec hodie celebrantur in ecclesia sancti Laurencii predicta. Dicit eciam, quod nunquam apud predictam ecclesiam parrochialem sancti Laurencii fiat cum reliquiis ac cruce processio, sed semper apud ecclesiam ipsius monasterii predictam. Quodque plebani ipsius ecclesie sancti Laurencii veniant et venire debeant ac ab antiquo venerunt ad ecclesiam monasterii predicti, quando ibidem sic processio fiebat circuitus et hodie fit. Dicit eciam, quod omnes scolares loci apud sanctum Gallum visitent et frequentent suppelliciati singulis diebus chorum ipsius ecclesie monasterii predicti et nunquam ecclesiam parrochialem sancti Laurencii, nisi a plebano ibidem conducantur. Addens expresse, quod eciam^a) monasterii predicti nullo subiaceat ecclesie sancti Laurencii prefate, assignans pro causa sciencie sue, quod de loco apud sanctum Gallum sit oriundus et duodecim annis fuerit predicte ecclesie sancti Laurencii plebanus et semper sic servari viderit et eciam ab antiquo sic servatum esse audiverit a personis fidedignis, nil aliud deponit diligenter requisitus. Johannes doctor puerorum in sancto Gallo³ testis iuratus non odio non timore non precio nec favore requisitus deponit, quod ipse firmiter credat ecclesiam monasterii predictam esse maiorem loci ecclesiam ex eo maxime, quia pro tempore, quo ipse fuerit doctor puerorum ibidem, qui sunt et fuerunt modo in festo epiphanie huius anni, in quo nunc sumus, precise sedecim anni, ipse semper vidit in vigilia pasce et pentecostes baptismum et in festo purificacionis cereos, in festo palmarum Palmas in ecclesia monasterii predicti et non in ecclesia sancti Laurencii predicta benedici et conservari et ita semper factum esse a longe retroactis temporibus ante adventum sui in locum predictum audiverit, et quod viderit baptisari pueros infra octavas predictorum festorum pasce et pentecostes, addens quod eciam audiverit a fidedignis, quod ab olim pueri toto tempore inter vigiliam pasce et octavam pentecostes baptisati fuerunt pueri in ecclesia monasterii predicti. Item dicit, quod ipse in die palmarum adhuc singulis annis pro tempore, quo fuerit doctor loci aput sanctum Gallum, ymum Gloria laus Clara voce inceperit et primam iaciens palmam cum imposicione antiphone wlgentibus palmis, ex quo firmissime credit monasterium predictum matricis insignio perfrui, in aliis concordat cum plebano teste prescripto. Johannes dictus Schúlmaister olim magistercivium⁴ apud sanctum Gallum etatis forte quinquaginta annorum testis iuratus non odio non timore non prece nec precio nec favore requisitus deponit, quod ipse omnino ecclesiam monasterii predicti reputet esse maiorem ecclesiam loci aput sanctum Gallum, ex eo, quia non in ecclesia parrochiali sancti Laurencii predicta sed in ipsius monasterii ecclesia eadem in purificacione sancte Marie virginis gloriose cerei, in festo palmarum palme, in vigiliis festorum pasce et pentecostes baptismum benedicuntur et consecrantur, et hoc ipse testis semper servari viderit. Dicit eciam, quod aput ipsam ecclesiam sancti Laurencii nunquam fit processio cum cruce et aliis reliquiis sed semper aput ecclesiam predicti monasterii, et quod quando sic proceditur, plebani ipsius ecclesie sancti Laurencii veniant ad processionem huiusmodi et ab antiquo venerunt ad eandem, de frequentacione chori ecclesie monasterii predicti per scolares per omnia deponit, prout Johannes Rapp testis primus deposuit, hec dicit requisitus diligenter. Bilgrinus Spiser olim loci apud sanctum Gallum magistercivium⁵ etatis forte quadraginta annorum testis iuratus non odio non timore non preco^b) no(n)^c) precio nec favore deponit et plane^d) concordat cum Johanne Schůlmeister teste proximo, addens quod iste eciam istis temporibus post benedictionem, que fit in ecclesia predicti monasterii, pueri in eodem monasterio ad octo dies baptisentur, assignans pro causa sciencie, quod oriundus sit de sancto Gallo et quod semper ibidem moram traxerit et suis temporibus sie servari viderit et ab aliis suis senioribus sie ab olim servatum esse audiverit. Dat. Constan(cie) anno domini millesimo trecentesimo sexagesimo septimo, IIII kl. augusti, indictione quinta.

Source Fulltext: Chartularium Sangallense VIII, Nr. 5082, S. 261-262.