Allen^a) den, die disen brief an sehent lesent oder ho^erent lesen, kúnd ich Johans von Frowenuelt¹ ritter vnd vergih offenlich mit disem brief, || daz fúr mich kam ze Swarzenbach² in dem dorf die erbern lút Johans Bv^man, Růdolf sin sv^n vnd Nesa des vorgenemten Jo||hans swo^ester mit Cůnrat dem Amman irem elichen man vnd irem rechten vogt, der iro do ze stett mit recht vnd mit || vrtail ze vogt ertailt wart^b), vnd offenoten a^ellú vnd veriahen mit irem fúrsprechen, das sú sich wilklich gern vnd vnbetwungenlich verzihen wolten des hofes gelegen ze Swarzenbach, den man nemt Magelspergs³ hof, vnd aller recht rechtung vordrung vnd ansprach, so sú a^ellú ald dehains vnder in von lipdinges ald von kainer laig ander sach wegen an dem zů dem vnd von des vorgeschriben hofs wegen ie gehan hettint ald noch gewinnen mo^echten, hin in der erwirdigen frôwen der a^ebtischinninen vnd des gemainen conuentes handen des closters ze Magnôw⁴ vnd ir nachkomen, ob sú ênwarin, vnd baten mich vorgenemten richter ze erfarn, wie sú das tůn solten, das es kraft hett ietz vnd hernach. Do fragt ich vorgenemter richter vmb vnd wart mit gemainer vrtail ertailt, das die egenemten Johans Bv^man vnd Růdolf sin sv^n mit iren handen vnd dú vorgenemt Nesa mit iro vnd des vorgenemten ir elichen mans vnd ir rechten vogtes hand das tůn solten an des gerichtes stab vnd das es also wol kraft hett vnd haben mo^echt ietz vnd hernach. Do giengen die vorgenemten Johans Bv^man vnd Růdolf sin sv^n vnd och dú egenemt Nesa mit dem vorgenemten irem elichen man vnd irem vogt vnd griffen an des gerichtz stab vnd gaben do ze stvnd ledklich vf vnd och frilich mit dem stab a^ellú gemainlich vnd ainhelklich vnd verzigen sich vor offem gericht fúr si vnd alle ir erben vnd nachkômen des vorgenemten hofes ze Swarzenbach vnd aller recht rechtung vordrung vnd ansprachan, so sú von lipdinges ald von kainer laig ander sach wegen an dem zů dem vnd von des vorgeschriben hofs wegen ie hatten gewunnen ald noch hinnenhin iemer gehan oder gewinnen mv´gen ald mo^ehten in dehain wise, hin in der vorgeschriben a^ebtischinnen vnd des gemainen conuentes hand ze Maggenôw vnd iro nachkomen, ob sú enwa^erin. Vnd ist dis alles redlichen vnd recht beschehen volfu^ert vnd volbraht mit allen worten werken geba^erden vnd geta^eten vnd och mit vo^egten vnd fúrsprechen, so darzů gehorten vnd notdúrftig waren vnd als recht sitt vnd gewônlich was vnd als mit gemainer vrtail ertailt ward, vnd do batt mi der amtman miner vorgenemten frowen ze Maggnôw inen des gerichtes brief hievmb geben, der ward inen mit gemainer vrtail ertailt. Vnd ze ainer warhait aller diser vorgeschribener ding henk ich Johans von Frowenuelt ritter da vorgenemt min insigel von dez gerichtes wegen an disen brief, der geben ist ze Frowenuelt in der stat in dem jar, do man zalte von gottez gebúrt drúzehenhvndert iar, sechzig iare vnd darnach in dem sibenden jar, an dem mayen tag, won ich des selben tages offen jargericht da hatte ze Swarzenbach.

Source Fulltext: Chartularium Sangallense VIII, Nr. 5062, S. 243-244.