Ich Hainrich der Wyger burger zu Liv^ekirch¹ vergich offenlich fu^er mich vnd fu^er min erben mit disem brieff allen, die in ansehen oder ho^eren || lesen, daz ich dem vesten ritter her Marqwarten von Schellenberg² vnd Ma^erken von Schellenberg sins brůder³ sun vnd iren erben || ze rehtem kovff gegeben hân den hoff ze Bra^enberg⁴ gelegen, den ich vmb Chůnr. von Bra^enberg vormals erkovfft havn, es si an || holtz an veld an akker an wis an waid an wazzer genemptz vnd vngenemptz besůchtz vnd vnbesůchtz, vnd darzů daz holtz vnd bodemm, daz man nempt daz Westerholtz⁵, daz ôch ze Bra^enberg gelegen ist vnd daz ôch vormals zů dem selben hoff erkôfft ward vnd ôch etwie vil zitz darzů genozzen, vnd hân in ôch geben den vorbenempten hoff vnd ôch daz vorbenempt holtz fu^er ledigs vnd fu^er recht lehen von dem gotzhus von sant Gallen, dannan es in ze lehen verlihen ist, vnd hânt mir dar vmb gegeben vnd gewert siben vnd sibentzig phunt Cost(e)n(tzer) mu^enss gůter vnd gna^emer, die ich also bar dar vmb von in enphangen hân vnd die all an minen nutz komen vnd bewent sint, vnd darvmb bin ich iro vnd irr erben des vorbenempten hoffs mit aller zů geho^ert vnd des vorbenempten Westerholtz genant recht gewer worden fu^er mich vnd min erben vnd fu^er aller ma^englichs redlich ansprach vff gaistlichem vnd vff weltlichem griht nach lehens recht. Vnd ze merer sicherhait so hân ich inen vnd iren erben vmb den vorgescriben hoff mit aller zů geho^ert vnd vmb daz vorbenempt holtz zů mir vnd zů minen erben ze rechtem geweren gesetzt Chůntzen den Wyger mins brůder sun burger ze Liv^ekirch mit der beschaidenhait, wa^er ob der vorbenempt hoff oder div, die darzů geho^erent, oder daz vorbenempt holtz von iemen anspra^echig wurdin, da su^eln ich oder min erben si vertretten nach lehens recht vff gaistlichem vnd vff weltlichem griht vnd su^eln die ansprach ledig vnd los machen ân iren schaden. Ta^eten wir des nit vnd wurd es anspra^echig, so hânt si gewalt, mich vnd min erben vnd den vorbenempten geweren vnd sin erben ze no^etent vnd ze phendent in stetten oder vff dem land, wie vnd wa si ku^ennen oder mu^egen, als vil vnd als dikk, bis daz der vorbenempt hoff mit aller zů geho^erd vnd daz vorbenempt holtz gar vnd ga^entzlich ledig vnd los worden ist ân iren schaden, vnd su^eln ôch an der phandung nit fra^eveln noch tůn wider dem lantfrid noch wider dehainer gesetzt, die herren oder stett ietzo gesetzt heten oder noch satztin, noch wider dehainem griht gaistlichem noch weltlichem. Ich sol den vorbenempten geweren lo^esen ân sinen schaden. Vnd des alles ze ainem waren offem vrku^end so gib ich Hainr. der vorbenempt Wyger fu^er mich vnd fu^er min erben den obgen(empten) von Schellenberg vnd iren erben disen brieff besigelten mit des erber mannes Bentzen Berhtoldes stattammans ze Liv^ekirch insigel, der es gehenkt hât an disen brieff durch min bett vnd durch des vorbenempten geweren flizziger bett willen, won wir ayger insigel nit haben. Da zů ze ainer ziv^egnu^ezz so hânt die erber mann Chůnr. der Burger vnd Hans Clotz iriv^e insigel gehenkt ôch an disen brieff, doch in selber ân schaden. Dirr brieff ward geben des jares, do man zalt von Cristus gebu^ert driv^etzehenhundert jar vnd darnach in dem nv^en vnd sehtzigostem jar, an dem na^ehsten ma^entag vor sant Vrbans tag.

Source Fulltext: Chartularium Sangallense VIII, Nr. 5175, S. 343-344.