Ich^a) Haintz Senne sesshaft ze Vadutz¹ kúnd vnd vergich offenlich mit vrkúnd dis briefs allen den, die in ansenhent oder ho^erent lesen, daz ich || mit gůter vorbetrahtung nah ra^vt miner frúnd vnd erben vnd sunderlichen nah raut willen vnd gunst des edeln hoherbornen mines gne||digen herren graf Hainrichs von Werdenberg von Sanga^vns² reht vnd redlich aigenlich vnd ewenklich ze ko^vffent geben ha^vn der erberen || frowen fro Nesun^b), Vaislins³ sa^eligen elichen wirtinne wilent waz, vnd Hansen irem sun vnd allen sinen geswistergiten des selben Vaislins sa^eligen kinden den zenhenden halben, der ze Vadutz gelegen ist in dem dorf vf der ebni. Disen obgenanten zenhenden mit grund mit grat mit aller zů geho^erd ha^vn ich inen vnd^c) erben aigenlich vnd ewenklich ze ko^vfent geben vmb sehs vnd drissig pfund pfenning gůter vnd gnemer Costentzer múns, der ich von inen gar vnd gentzlich gewerot bin vnd in minen redlichen nutz komen sint, mit solichem geding vnd beschaidenhait, alle die gemaind, die ich mit inen ha^vn vnd sú mit mir von des obgenanten zenhenden wegen, die sol inen vnd iren erben vnd mir vnd minen erben enkainen schaden bringen von erbschaft wegen weder lútzel noch vil, vnd sol iederman erben in aller der wise, als ob es kain gemaind wa^er. Ich vnd min erben so^ellind och ir vnd iro^d) vmb disen obgenanten zenhenden mit aller zů geho^erd gůt wern sin sont^e) nah reht, wa sú sin iemer bedúrffent oder nottúrfftig werdent an gaistlichem ald an weltlichem geriht mit gůten triwen a^vn alle geua^erd. Vnd des ze waren offner vrkúnd so ha^vn ich gebetten den obgenanten minen gnedigen herren gra^vf Hainr. von Werdenberg von Sanga^vns, daz er fúr mich sin insigel henki an disen brief, daz selb min insigel ich obgenanter graf Hainr. von Werdenberg von Sangâns durch flissiger bet willen des obgenanten Haintzen Sennen mines aigenn kneht vnd och dirr obgenant ko^vff mit minem willen vnd gunst vollefůrt vnd beschenhen ist, min aigen insigel gehenket ha^vn an disen brief. Der geben wart ze Veltkilch⁴ des jares, do man zalt von Cristus gebúrt drúzehen hundert jar, in dem sibentzigo^f) jar, an sant Laurentzen aubent.

Source Fulltext: Chartularium Sangallense VIII, Nr. 5237, S. 423-424.