Wir graf Fridrich von Zolr der elter herre ze Schalczburg¹, graf Fridrich sin brůder chorherre ze O^vgspurg², graf Fridrich von Zolr || ritter³, graf Fridrich von Zolr⁴, den man nemmet graf Múlli⁵, des selben graf Fridrichs von Schalczburg êlichen sún, veriehen || vnd tu^en kunt mit disem brief allen, die in ansehent lesent oder ho^erent lesen, alz der erwirdig v´nser gna^ediger herre abt Geori von || gottes gnâden abt des gotzhus ze sant Gallen⁶ von besunder gnâden durch sinen gůten willen graf Fridrichen von Zolr closterherren⁷ des vorgeschriben gotzhus ze sant Gallen min des vorgenemten graf Fridrichs von Zolr von Schalczburg êlichen sun verlihen hât die propstye Zaisseltzhusen⁸, den hof ze Truhtolfingen⁹ vnd den hof ze Frumerun¹⁰, die von dem vorgeschriben gotzhus ze sant Gallen closterlehen sint, mit lúten mit gu^etern vnd mit allen rehten nútzen vnd gewonhaiten vnd mit aller zůgeho^erd, daz wir da alle vier die vorgenemten von Zolr mit gůten trúwen gelopt haben vnd lobent mit disem brief, daz wir den selben graf Fridrichen closterherren dauorgenemt bi den vorgeschriben gu^etern vnd closterlehen vnd bi allen den rehten nútzen vnd gewonhaiten, so darzů vnd darin geho^erent, es sie zins zehend erb erbschaft fa^ell oder gela^est, súllen lassen beliben vnd in daran nierner gesumen geirren noch bekrenken ân geua^erd, also v´ns vnd v´nsern erben an v´nsern lehen vnd rehten, so wir vormals zů den selben vorgeschriben gu^etern gehept hânt, vnscha^edlich. Wir súllen o^vch den selben graf Fridrichen an den selben gu^etern vnd closterlehen dabi vnd daran schirmen gen ma^englichem vntz an ain gaistlich reht, ân geua^erd. Bescha^eh o^vch, daz der vorgenemt graf Fridrich closterherre dauorgenemt vsser dem vorgenemten gotzhus vnd orden ze sant Gallen ka^emi vnd lay wurd oder daz er ab gieng von to^vdes wegen oder v´nserm vorgenemten herren abt Georien oder sinen nâchkomen vngehorsam wurd, daz wir dann v´nsern vorgenemten herren abt Georien sinen nachkomen noch die, denen dann dú selben gu^eter vnd closterlehen, so im ietz ze mal verlihen sint oder noch verlihen werdent, von dem vorgeschriben gotzhus ze sant Gallen verlihen sint, an den selben gu^etern vnd closterlehen noch an den nútzen, so dauon kornent, niemer gesurnen geirren noch bekrenken sont weder mit gaistlichem noch mit weltlichem geriht noch ân reht noch mit enkainen andren sachen weder von geltschuld von schaden von búrgschaft von reht noch von gewonhait noch von dekainer lay ander sach wegen, wie sich das fu^eget, vnd daz o^vch dann die selben gu^eter vnd closterlehen mit allen rehten von v´ns vnd von v´nsern erben gantzlich ledig vnd los sin vnd wesen sont vnd daz wir noch v´nser erben enkain reht vordrung nach ansprach darzů nierner mer haben súllen. Wa^er o^vch, daz wir oder v´nser erben darumb gen v´nserm vorgenemten herren abt Georien oder gen sinen nâchkomen ze dem rehten ka^emin, daz sú dann reht darumb haben sont vnd wir vnreht. Vnd des ze ainer warhait aller diser vorgeschriben ding vnd geding haben wir die vorgenemten alle vier von Zolr v´nseri insigel gehenket an disen brief. Der geben ist ze Schalczburg an dem na^ehsten fritag nach sant Jacobs tag ze ho^ewat in dem jar, do man zalt von gottes gebúrt drúzehenhundert jar vnd darnach in dem sibentzigosten jar.

Source Fulltext: Chartularium Sangallense VIII, Nr. 5236, S. 422-423.