Ich Eglolf von A^emptz¹ ritter kúnd vnd vergich offenlich mit disem brief fúr mich vnd min erben allen den, die disen brief sehent oder ho^erent lesen, dz ich || mit gůter vorbetrachtung nach ra^vt miner frúnd vnd erben ains lieplichen frúntlichen vngeuarlichen wechsels v´ber ain bin komen vmb disú nachgeschribnen || zway mentschen mit den ersamen herren brůder Johansen Ba^echlin pfleger des huses ze Veltkirch sant Johans ordens² vnd mit dem hus vnd mit den || brůdern gemainlich, also dz ich inen vnd iren nachkomenn ze rechtem aigen geben ha^vn vnd o^vch irem hus ze aigen gib mit vrkúnd dis briefs den drittentail, den ich gehebt ha^vn an Hansen Phylippen ab der Haldun³ elichen sun, der mir mit rechter aigenschaft zů gehort den dritten tail von siner můter sa^elgen wegen Annun, dú Ru^edis sa^elgen von Wiler⁴ elichú tochter was, den obgenanten knaben mit lib mit gůt ligendem vnd varendem gůt besůchtem vnd vnbesůchtem gůt mit twingen mit ba^ennen mit va^ellen mit gela^essen mit aller ehafti vnd rechten, als ich^a) den selben knaben vntz her fúr aigen inne gehebt ha^vn, ha^vn ich inen ze rechtem wechsel ze aigen geben vmb Elsen sin swo^ester vatter halb, dú die obgenanten gaistlichen herren vnd iro vorgenantes hus mit rechter aigenschaft zů gehort den drittentail von ir můter sa^elgen wegen Annen vsserm Kobelwald⁵, vmb die selben tochter den drittentail vmb lib vnd gůt vnd vmb all zůgeho^erd, als der brief vrkúndet, den ich von inen ha^vn. Vnd ist doch dirre wechsel geschehen mit so^elichem geding, dz sú in baiden wechseln ze baider site erben so^vnd vnd erbsrecht ha^vn sond, als sitt vnd gewonlich ist vnder frúnden. Des vorgedachten wechsels ich vnd min erben der obgenanten gaistlichen herren vnd iro nachkomenden vnd des obgenanten huses gůt weren sin so^ellent, was sú sin notdúrftig werdent an gaistlichem oder an weltlichem gericht, na^vch recht. Vnd des ze warem offnen vrkúnd henk ich Eglolf von A^emptz ritter fúr mich vnd min erben min aigen insigel an disen brief, vnd ward dirre brief ze Veltkirch gegeben des iares, do man zalt von Cristes gebúrt drúzehenhundert jar, dar nach in dem ains vnd sibentzgosten jar, an dem na^echsten zinstag vor inga^endem mayen.

Source Fulltext: Chartularium Sangallense VIII, Nr. 5269, S. 464-465.