Allen^a) den, die disen brief an sehent lesent oder ho^erent lesen, kúnd ich Haintz von Lo^enberg Johans sailigen elicher svn von Lo^enberg¹ vnd vergich offen||lich mit disem brief fúr mich vnd fúr alle min erben, das ich mit gůter beschaidenhait vnd vorbetrahtung von miner redlichen nôt vnd sach || wegen reht vnd redlich verkoft han die vogtye ze dem dorf ze Bramschofen² mit allen rehten nútzzen vnd gewônhaitten vnd mit aller zů||geho^erd, die von dem edelnn heirren^b) herr Hainrich von Hêwen³ friien vnd ritter min reht lehen was, vnd han ze koffenn geben dem fromen wolbeschaidenn V^olrich Kupfersmit genant Wirri burger ze Wil⁴ vnd sinen erben, ob er ênwa^er, vmb fúnfzig pfunt siben pfunt vnd ainen schilling pfenning alles gůter Costentzer mv´ns, der ich aller gar vnd gantzlich von im bin gewert an den stetten, da ich minen nûtz vnd fromen mit geschaffot han, vnd han ôch dem selben V^olr. Kupfersmît die vorgeschriben vogtye mit allen rehten mit des vorgenanten herr Hainrichs von Hêwen hand vfgeben vnd geuertegot, als reht sitt vnd gewônlich was. Ich han och den vorgenanten V^olrich Kupfersmit vmb die vorgeschriben vogtye in nútzlich gewer gesetzt. Vnd han mich och darúber verzigen vnd entzih mich och mit disem brief gantzlich gar luterlich vnd och letklich fúr mich vnd fúr alle min erben vnd nâhkommen gen dem vorgenanten V^olr. Kupfersmit vnd gen allen sinen erben vnd nâhkommen aller aigenschaft aller lehenschaft aller manschaft aller kvntschaft aller gewer aller zúgnust lút vnd brief alles rehten gaistlichs vnd weltlichs gerichtes aller vordrung vnd ansprach, so ich zů der vorgeschriben vogtye ald daran hatte oder hernach iemer gehan gewinnen oder erwerben mo^ehti von reht oder von gewonhait oder von dehainen andren sachen. Ich han och gelobt fúr mich vnd fúr alle min erben, des vorgenanten V^olr. Kupfersmitz vnd siner erben der vorgeschriben vogtye vnd des kofs reht wer ze sinne gen aller maniglichem vff gaistlichem vnd vff weltlichem geriht, wenn wa vnd wie dik sin der selb V^olr. Kupfersmit oder sin erben vnd nachkomen des bedurfent ald darumb von ieman angesprochen oder vf getriben werdent, das ich vnd min erben sú darûmb ân allen fúrzug vnd wider rede vnd ân allen iren schaden versprechen vnd verstan sont vnd von der ansprach entrihen vnd ledig machen ân alle geuerd. Vnd hierúber ze ainem offenn vnd warem vrkúnd vnd sta^eten sicherhait aller vorgeschribner ding vnd gedingde han ich Haintz von Lo^enberg da vorgenant min insigel fúr mich vnd fúr min erben offenlich gehenkt an disen brief. Der geben ist ze Wil in der stat an dem na^ehsten zinstag vor mitter vasten, do man zalt von gottes gebúrt drúzehenhundert jar, darnach in dem zway vnd sibentzigosten jar.

Source Fulltext: Chartularium Sangallense VIII, Nr. 5312, S. 504.