Allen den, die disen brief ansehent oder ho^erent lesen, kúnd ich Heinrich von Helmenstorf ritter vogt¹ vnd || wir der rat der stat ze Rapreswil² vnd veriehen offenlich an disem brief, daz fúr v´ns kamen an || offen gericht Cu^eni Vischentaler vnd Anne sin elichú wirtinn einunt vnd Ru^edi Kuster andrunt, || vnd offnotent da der selb Vischentaler vnd Anne sin wirtinn, daz sú Ru^edin Kvster recht vnde redlich ze ko^vffenn ga^eben hettin ir hus vnd hofstad mit aller rechtumg^a), so darzů geho^ert vnd als es sú an komen was, daz gelegen ist einunt bi dem bach vnd andrunt an Ru^edis Wissenhorns hus, vnd mit so^elicher bescheidenheit, daz ja^erlich adem^a) hus vnd hofstad ein halb mút kernen gat vnd zwên schilling pfennig Zúricher múntz, vnd hettin im daz geben vmb zwentzig pfvnd pfenning Zúricher múntz genger vnd gena^emer, der sú aller von dem selben Kvster gantzlich gewert wa^erint. Vnd stůnden dú selben Cu^eni Vischentaler vnd Anne sin wirtinn fúr gericht an den stab vnd entzigen sich fúr sú vnd ir erben aller der rechtunng vnd ansprach, so sú an dz selb hus vnd hofstad ie gehatten ald iemer hienach gewúnnen mo^echten mit geistlichen oder mit weltlichen gerichten, vnd vertgotens dem vorgenanten Ru^edin Kvster an den stab in sin hant vnd des recht wer ze sinne nach recht. Vnd des ze einem vesten vrkúnde, won dis als vor v´ns am offem gericht beschehen ist, als gericht vnd vrteil gab vnd als v´ns vnd ander erber lúte, die hier vmb gefragt wurden vnd erteilten vff den eid, daz die důcht, daz es wol beschehen wa^er, daz es billich kraft vnd macht het nu vnd hie nach, da von so haben wir die obgenanten der vogt vnd der rat der stat ze Rapreswil der selben v´nser statt insigel nach rechter vrteil vnd durch beider teil ernstlicher bett willen offenlich gehenket an disen brief. Der geben ist an dem zinstage nach der alten vasnacht in dem jare, do man zalt von gottez gebúrt drútzehenhundert jar vnd sibentzig jare vnd dar nach in dem andren jare. Hie ze gegen waren V^olrich Frijo, V^olriche Windegger, Heinrich Kaltprvnner, Eberhart der Wu^est des rates vnd ander erber lúte.

Source Fulltext: Chartularium Sangallense VIII, Nr. 5310, S. 502-503.