Bonifatius episcopus seruus seruuorum dei dilectis filiis abbati et conuentui monasterii in Altouado Cisterciensis ordinis Pragensis diocesis salutem et apostolicam benedictionem. Exposcit uestre deuocionis sinceritas et religionis promeretur honestas, ut tam uos, quos spetiali dilectione prosequimur, quam monasterium uestrum condignis honoribus attolamus. Hinc est, quod nos nostris in hac parte supplicationibus inclinati, ut tu fili abbas et successores tui abbates dicti monasterii, qui pro tempore fuerint, mitra anulo baculo pastorali sandalis et aliis pontificalibus insigniis libere, ut possis et possint, nec non quod in dicto monasterio et prioratibus eidem monastcrio subiectis ac in parrochialibus et aliis ecclesiis ad uos communiter uel diuisim pertinentibus, quamuis uobis pleno iure non subsint, benedictionem solemnem post missarum vesperorum et matutinarum solemnia, dummodo in benedictione huiusmodi aliquis antistes uel sedis apostolice legatus presens non fuerit, elargiri ac vestes et alia ornamenta ecclesiastica necnon calices et altaria non consecrata consecrare et benedicere ac ecclesias et cimiteria sangnini aut seminis effusione polluta monasteriorum prioratuum et ecclesiarum predictorum reconciliare et monachis nouitiisque eiusdem monasterii minores ordines impendere libere et licite ualeas et successores prefati ualeant, deuotioni uestre auctoritate apostolica tenore presentium de spetiali gratia indulgemus, felicis recordationis Alexandri pape im. predecessoris nostri que incipit: "Abbates“, et aliis constitucionibus apostolicis necnon statutis et consuetudinibus tam huiusmodi monasterii quam ordinis uestri ac aliis contrariis non obstantibus quibuscunque. Per hoc autem constitutioni, que huiusmodi reconciliationes per episcopos tantum fieri precipit, nullum alias uolumus preiudicium generari. Nulli ergo omnino hominum liceat hanc paginam nostre concessionis infringere uel ei ausu temerario contraire. Si quis autem hoc attemptare presumpserit, indignationem omnipotentis dei et beatorum Petri et Pauli apostolorum eius se nouerit incursurum. Datum Rome apud sanctum Petrum Id. Nouembris. Pontificatus nostri anno quartodecimo.

Source Fulltext: PANGERL, Stift Hohenfurth (=FRA II/23, Wien 1865) S. 234-235