In nomine domini amen. Actus temporum facile vacillant edacis exterminio velustatis absorpti hominum a memoria et labuntur, nisi scripture viuacis presidio ac fidelium testium amminiculo roborati perhennentur. Quoniam apices litterarum rei geste noticiam maxime perpetuant, a capcionibus doli hominum tempore labente defendunt et conseruant, de consilio sane prouidencie est inductum, vt recordacione durante in scripti efficaciam redigantur. Nos igitur Otto miseracione diuina abbas Petrus prior Przibiko cellerarius totusque conueutus fratrum monasterii in Altouado ordinis Cisterciensis Pragensis diocesis tenore presencium publice profitemur, quod famosus Weczlinus de Czipyn armiger dicte diocesis sanus et incolomis mente pariter et corpore non compulsus nec coactus, sed ex mera pura et propria sua liberalitate ob remedium sui ipsius salutare et animarum suorum progenitorum dedit assignauit et donauit nobis prefatis abbati et conuentui quinquaginta duas sexagenas grossorum denariorum Pragensium pecuniis in paratis ad censum annuum perpetuum occurrentem comparandum, et vnam sexagenam grossorum dictorum denariorum census annui perpetui cum duodecim denariis et duobus pullis in curia Haynczlini in Stackarn et in villa Swyetlik in allodio, wlgariter Sedlisscze nuncupato Jaklini, per pyttanciarium tollendem, ac vnum talentum denariorum census annui perpetui in eadem villa Swietlik super allodio Petri filii judicis per custodem dicti monasterii tollendum. Talibus tamen condicionibus et oneribus prehabitis primo, quod omni die celebri, siue sit simplex feria, siue quod festum occurrat mane, circa ortum solis vel maturius, prout ipsis abbati et conuentui melius conuenire videbitur, vnus de fratribus dicti conuentus debet officiare siue legere missam de assumpcione sancte Marie et hoc nominaliter in et super altari sancte crucis in prefato monasterio non obstante missa illa, que incipit: "Salue sancta parens“, que ex ordine in claustro predicto solita est celebrari. Et eidem presbitero huiusmodi missam legenti pyttanciarius prefati monasterii prouidere debet de ferculis et potacionibus, sicut domino priori aut in suo loco residenti circa nolam in refectorio conuentus nichil minuendo, custosque qui pro tempore fuerit, pro talento denariorum prefato ad officium eiusdem misse quolibet die, ut prefertur, duas candelas cereas incendere debebit, a principio usque finem ardere permittendo. Pyttanciarius vero prenominati monasterii pro tempore existens in die sancti Nicolai omni anno de dicta sexagena grossorum cum duodecim denariis in Stackarn et in Swietlik, ut prefertur, fratribus ibidem in refectorio prandium faciat ad extensionem eiusdem sexagene, quousque predictus Weczlinus viget in humanis; ipso vero decedente tunc in antea in die obitus et demum in anniuersario ipsius quolibet anno sequente perpetuis futuris temporibus dictum prandium prenominatis fratribus ordinetur pittanciarium per eundem, Insuper tali die obitus ac anuiuersarii idem pittanciarius pauperibus in porta dicti monasterii denarios distribuet quadraginta. Nos quoque prenominatus abbas prior cellerarius totusque conuentus bona fide et sub fidei ac consciencie nostre puritate promittimus et spondemus, inviolabiliter rata grata atque firma omnia et singula onera suprascripto de primo ad vltimum implere perficere et prosequi negligencia dolo et fraude omnimode postergatis. Si autem, quod absit, omnia onera prescripta seu aliquod illorum per nos prefatos abbatem et connentum neglectum seu obmissum fuerit et non adimpletum, extunc nobilis dominus Henricus de Rosembergh aut heredes ipsius fundatores dicti monasterii habet et habebunt omnimodam ac potestatem plenariam, quam sibi damus presentibns, nos prefatos, abbatem et conuentum compellendi et artandi oninibus ac singulis oneribus suprascriptis ac cuilibet illorum omnimode subiacere eademque prosequi, prout superius sunt notata. In cuius rei robur presentem litteram ipsi Weczlino et heredibus suis damus sigillis nostris videlicet Ottonis abbatis ac conuentus dicti monasterii de nostris scitu et voluntate appensis sigillatam, et in testimonium nobiles domini Henricus et Petrus filius eius primogenitus de Rosembergh nostri benigni fundatores ad preces nostras sigilla ipsorum de eorum certa sciencia presentibus sunt appensa. Datum anno incarnacionis domini nostri Jesu Christi millesimo quadringentesimo quarto in die sancti Jacobi apostoli in nostro monasterio antedicto.

Source Fulltext: PANGERL, Stift Hohenfurth (=FRA II/23, Wien 1865) S. 236-238