Frater Johannes abbas Morimundi ordinis Cisterciensis Lingonensis diocesis venerabili patri et in Christo nobis precarissimo coabbati nostro monasterii de Altouado nostri prefati ordinis Pragensis diocesis salutem et sinceram in domino caritatem. Sciatis, nullum episcopum aut aliam personam debere habere pensionem super monasteriis nostri ordinis et hoc eidem ordini plurimi summi pontifices concesserunt et priuilegia dederunt, insuper nulli episcopo eciam de ordine assumpto prouidere tenemur, nisi de voluntate ipsius ordinis fuerit promotus, super quo eciam priuilegia habemus. Quibus non obstantibus prout a fide dignis inteleximus, dominus Sigismundus episcopus Salonensis dudum vestri monasterii abbas a vobis et ab eodem vestro monasterio certam pensionem siue prouisionem pro tempore repetit et vos ad ipsam soluendam cogit, super quo prouidere volentes in plenaria auctoritate nostri ordinis qua furgimur, sub inobedience et aliis nostri ordinis formidabilibus penis vobis inhibemus, ne amodo contra ordinis vestri privilegia quamcumque pensionem seu prouisionem predicto domino Sigismundo soluatis, et si que habet compulsoria, ab eisdem ad summum pontificem appelletis. Insuper sub predictis penis vobis precipimus, quatenus debita cum instancia requiratis a prefato domino episcopo clenodia et alia bona que vt dicitur, cum reuerencia loquendo oculte et quasi furtiue a vestro monasterio exportauit. Super premissis, que feceritis, nos aut capitulum nostrum generale informaturi et de remedio oportuno prouidebimus. Datum in monasterio de Hilaria sub appensione sigilli nostri sexta die mensis Septembris anno domini millesimo quadringentesimo quinquagesimo tercio. F. de Brieyo m. p.

Source Fulltext: PANGERL, Stift Hohenfurth (=FRA II/23, Wien 1865) S. 279-280