Ich Peter Frerneyser gesessen zu Vlrachsperg mein hausfraw vnd all vnser erben bekennen vnd thuen kund offenleich mit dem brieff allen, die ihn sehent horent oder lesen, das wir mit guetem willen vnd bedächtleich vnd auch nach rat willen vnd gunst vnserer nagsten pesten frewndt vnd sunder zu der zeit, da wir das rechtleich wolgethun machten vnd recht heten, recht vnd redleich verkaufft vnd zu kauffen gegeben haben dem edlen Gorgen Grossawer, die zeit phleger zu Witibinhawsen vnd allen seinen erbenn vnsrew zway gueter, gelegen zu Reyhenaw oben an dem ort vnd in der herschafft Witibhausen mit aller zuegehorung vnd mit allen eren rechten vnd nutzen diensten gulten vnd vadrung, so von alter darzue gehoerent vnd yezundt da bey sind vnd hinfür da von bekommen mugen, es sey zu hoff zu haws zu holtz zu veld wayd wysmad wasser graem zäunn rain stoekh stain gruntt vnd podem bey klain bey gross besucht vnd vnbesucht nichts ausgenommen, als wir das selbs inne gehabt genützt vnd genossen haben rechtt vnd gar aygenleich, zu einem ewigen stäten kauff verkaufft vnd zu kauffen geben haben, als solhigs kauff vnd des lannds, dar inn dy benanten zway güter ligent, recht ist vngeuarleich, vmb ain sumb gelts der wierr von inn gantz vnd gar ausgericht vnd betzalt sein worden zu rechtter zeit vnd weyl ann allen vnseren schaden. Wir haben inn auch dy wenanten zway güter mit allen iren zuegehörung inngeanntbürdt vnd vbergeben aus vnser vnd aller vnser erben gewalt nutz vnd gewer inn sein vnd aller seiner erben gewalt nutz vnd gwer. Wir vertzeyhen vns auch der aller gar vnd gäntzleich inn krafft des gegenbürtigen brieffs inn solher mass vnd beschayden, das ich obgenanter Peter Freneyser mein hausfraw vnd all vnser erben noch ander yemat von vnserntwegen zu den obgemelten zwayn guetern vnd aller irer zugerung nun hinfür ewirkleich kain zueuersicht recht erbschafft vnd vadrung nyrn«r mer haben noch gebingen sullen mit recht noch ann recht, geystleich noch weltleich, sunder trewleich vnd an alles geuar, wir sein lebentig oder todt. Es scholl vnd mag auch der wenant Grossawer vnd all sein erben mit dem egemelten zwayn gütern vnd aller irer zugehörung nun fürbas allen iren nutz vnd frum wol damit betrachtten vnd dy innen haben hin lassen pawen nutzen vnd nyssen stifften stören besetzen enttsetzen verkauffen versetzen schaffen machen vnd gebem, wem sew wellent, ann vns vnd manikleichs von vnsernttwegen irrung vnd hindernuss. Ich obgenanter Peter Freneyser mein hausfraw vnd all vnser erben sein auch der egenanten zwayr güter zu Reichenaw mit aller irer zuegehorung vnd auch des kauffs irer recht gwer scherm vnd furstandt für all rechtleich ansprach, als offt inn des notturft beschiecht mit dem rechten, als solhs kauffs vnd lannds, dar inn dy wenanten zway güter ligent, recht ist. Gieng inn aber an dem kauff vnd gwerschafft icht ab, des sy zu schaden kommen, wye der schadt genant wurdt, den selben schaden allen schullen vnd wellen wir in gantz austragen vnd richtig machen ann all ire mue vnd schaden, vnd schullen auch das alles haben vnd bekomen zu vns vnsern erben vnd trewn vnd dar zue auf aller vnser hab vnd guet, wo wir die indert haben lassen oder gebingen auf wasser auff lanndt inn der lannds oder ausser lannds besucht vnd vnbesucht nichts ausgenomen, der aller mugen sew sich woll darumb vnderbinden vnd die innen haben nützen vnd nyssen so lang, vntzt sy haubtguts vnd schadens vollikleich dauon bekomen sind. Das ist vnser guttleich will vnd wort ausgenomen, ob der egenant Grossawer vnd all sein erben icht ansprach gebingen von dem künig zu Behaym, oder wem das war, von wegen der zwayer gütter zu Reichenaw, des soll ich obgenanter Peter Freneyser mein hausfraw vnd all vnser erben vnengolten sein vngeuärleich. Des zu vrkundt gib ich obgenanter Peter Freneyser für mich mein hausfrawn vnd all vnser erben den offen brieff betzeugt vnd bestatt mit der edlen Sigmund Stainpeken zu Stainpach vnd Oswalden am Perg baider anhangunden innsigel, dye sy bayd durich vnserer vleyssiger bett willen zu zeugnuss ann den offen brieff gehangen habent inn vnd allen iren erben vnd insigel an schaden. Vnder dy insigel wir vns obgenanntew verpinten bey vnseren trewn inn aydes weyss, alles war vnd stät ze haben, das der brieff inn halt vnd ausweyst. Der geben ist nach Christi geburdt vierzehenhundert jar vnd darnach inn dem sechsundfutzigsten jare ann sambtztag vor der heyligen drew kunig tag.

Source Fulltext: PANGERL, Stift Hohenfurth (=FRA II/23, Wien 1865) S. 285-286