Johannes miseracione diuina tituli sancte Sabine sacro sancte Romane ecelesie presbyter cardinalis de Aragonia ac apostolice sedis gratia legatus etc. vniuersis et singulis presentes litteras visuris lecturis pariter et audituris salutem in domino sempiternam. Dum preclara gloriose dei genitricis Marie insignia intra nostri cordis archana recensemus, dum etiam mente sedula rogitemus, quod ipsa ab eterno preordinata dei filium patri consubstancialem et coeternum mirabili spiritus sancti cooperacione pro humani generis primi parentis lapsu eterna pena militari redemptione deum nobis et hominem protulit saluatorem, apud quem pro nostra salute assidius intercessionibus instare non desinit, dignum ymmo pocius debitum reputamus, ut ecclesias et domus claustrales ad sui nominis reuerenciam dedicatas spiritualibus priuilegiis indulgenciis videlicet et remissionibus decoremus. Cupientes igitur toto desiderio et afectu ad supplicacionem reuerendi patris domini Thome humilis abbatis Altovaddensis, ut capella constructa et dedicata in honorem ipsius gloriose virginis Marie congruis frequentetur honoribus et a Christi fidelibus in debita veneracione habeatur ac luminaribus libris calicibus fabricis et aliis ecclesiasticis ornamentis congrue fulciatur et in eius structuris edificetur et edificiis conseruetur ac manuteneatur, fidelesque eo libencius deuocionis causa confluant ad eandem ecclesiam ac ad fulcimentum conseruacionem manutencionem et edificacionem huiusmodi manus prompcius porrigant adiutrices, quo ibidem dono celestis gratie se refectos, de omnipotentis dei misericordia ac beatorum Petri et Pauli apostolorum eius auctoritate confisi omnibus et singulis Christi fidelibus vtriusque sexus, qui dictam capellam omnibus festiuitatibus ipsius beate Marie virginis in anno occurrentibus in natiuitate domini in diebus etiam sanctis pache (sic) et penthecostes ac dedicacionis eiusdem annuatim ad fulcimentum et edificacionem huiusmodi manus porrexerint adiutrices, ut prefertur, nos pro singulis diebus predictis et vicibus, quibus id fecerint acdeuote orauerint et visitauerint, centum dies de iniunctis eorum penitenciis misericorditer in domino relaxamus, presentibus perpetuis temporibus duraturis. In quorum fidem et testimonium premissorum presentes litteras fieri jussimus nostrique sigilli pendentis fecimus communiri. Datum Trzebon decimo sexto die Nouembris millesimo CCCC. octuagesimo tercio. Pontificatus sanctissimi in Christo patris et domini nostri domini Sixti diuina prouidencia pape quarti anno tercio decimo. L. Aquilanus episcopus s.

Source Fulltext: PANGERL, Stift Hohenfurth (=FRA II/23, Wien 1865) S. 348-349