||
Wir Ludowig von Gots genaden marggraf ze Brandenburg und ze Lusiczz, des heiligen Romischen reichs oberster kamrer, pfallentzgraf bei Reyn, hertzog in Peyern ||
und in Kernten, graf ze Tirol und ze Gorcz und vogt der Gotzhauser, Agley, Triend und Prichsen , veriehen und tun chunt offenleichen mit disem brief, das ||
wir fur uns und alle unser bruder auf den vreitag vor Judica, als dieser brief geben ist, dem allerdurchluchtigsten fursten und unserm genedigen herren hern ||
Kareln, Romischem kunig, ze allen zeiten merer des reichs und kunig ze Peheim, getrewleich und warhaftigleichen, das heiligtum des heiligen reichs und ||
die cleynod, die da bei sind beynamen ein guldein crucze geziert mit edelin gestein und veinperlein, gancz und unverruckt, und in dem selben crucze ist das ||
sper und ain nagel unsers Herren, auch ist darinne ein stuck des heiligen cruczs, ein zan sant Johans des Tauffers in einer cristallen und sant Annen arme, ||
auch sind da besunder zwei swert, das eine sant Mauricien und das ander sant KareIs mit vergulten scheiden, auch ist da bei besunder gancz und unverruket ||
des egenanten heiligen keiser Karls guldein krone mit dem pogen und den crucze, die darauf gehornt, geworcht von mangem edeln gesteine und golde, ||
darinne ist besunder geworcht ein edel stein, den man nennet den waysen, auch ist da ein weizzer rock sant Karls an den armen geworcht mit gesteine ||
und mit perlein, und ein mantel sant Karls mit zweyn guldeinen lown geworcht von golde, von gestaine und von perlein, auch ist da ein guldein apfel ||
mit einem guldeinen crucze sant Karls und zwen seiner hantschuch mit gestaine, mit perlein und mit golde, und ein silbrein zepter, auch ist do ein ||
grozz vingerlein mit einem grozzen rubein, vier grozzen saphyren und vier perlein, das ist dar thomen von einem herczogen von Brunswig, auch ist do ein ||
ander vingerlein mit einem rubin und drey guldein sporn, auch ist do ein vergulter apphel mit einem crucze und ein vergult zepter, ein guldein rauch¬ ||
vas, zwey sinwelle stuck wachs und ein werm apphel, auch ist do ein blawer rok geworcht an den armen mit golde und mit perlein, und ein ||
ander brawn rock mit swarezen adlaern und ein gugel, zwen hantschuh und zwen schuch, der selben varbe, auch ist do ein stol geworht mit ||
golde gestain und perlein, und ein ander ainvaltigir stol, auch ist da ein ubergultes schreinlein, darinne ist ein demonstratio und ein cristalle ||
mit heiligtum und ein guldein ledig cruczlein, das was besunder unsers liben herren und vatters, keisers Ludowigs, seligen gaentzleichen an minner ||
nuzz und unverwechselt eingeantwurtt haben in alle der mazze, als uns das selb heiligtum unser vorgenant liber herre und vatter kaiser Ludowig seliger ||
gelazzen hat. Und das nemen wir auf den ayt und huldunge, die wir dem heiligen Romischen reyche gesworn und getan haben. Mit urchunde ||
diss briefs, der geben ist ze Munichen nach Krists geburt drewzehen hundert iar und darnach in dem funfzigisten iare an vreitag vor Judica.