||
Wir Ruprecht der Junger von Gots gnaden pfallntzgraf by Ryn und herczzog in Beyern bekennen und tun kunt offenlich mit disem brif allen den, die in sehen oder ||
horen lesen, wan der hochgeporn furste und herre her Rudolff, pfallntzgraf by Ryn, des Heiligen Romischen richs obrister truchsezz und herczzog in Beyern, unser lieber vetter, dem ||
allerdurchluchtigstem fursten und herren hern Karlen, romischem kung, ze allen ziten merer des richs und kunig ze Beheim, unserm lieben genedigen herren, und der durchluhtigsten ||
furstinn und frawen frawen Annan, romischen kuniginn, unserr lieben frawen und mumen, siner elichen wirttinn, und ir beider kindir und erben, ez sin sune oder tohter, alle sine ||
lande, herschefte, vesten und leute in der Pfallncz und in Beyern, und wa die gelegen sint und alle sine pfantscheft von wem er die innehat, und allez, daz er furbaz noch ge¬ ||
winnet mit gutem willen, ufgereicht und gegeben hat, und wir uns mit bedachtem mute fur uns, unser erben und nachkomen alles rechten ansprach und anredung, die wir ||
darzu in dheinewis haben und gehaben möhten, verzigen haben uzgenomen den rechten, die ein pfallnczgraf bi Ryn hat und haben sol an der wal und kur eins römischen kunges, ||
eins kunftigen keisers und andern eren und wirdicheiten, die zu den vorgenanten Pfallncz und kur gehörent, und den grafscheften und manscheften, die von der Pfallncz und kur ||
ze lehen rurent, die bi uns und unsern erben ewiclich beliben sullen, als in brifen, die wir dem obgenanten unserm herren daruber geben haben, vollekomenlicher geschriben und begriffen ist, ||
davon geloben wir fur uns, unser erben und nachkomen ewiclich mit guten treuen on geverde, dem obgenanten unserm herren frawe Annan, siner wirtinn, iren erben und nachko¬ ||
men an dem obgenanten lande in der PfalIencz und ze Beyern, wer daz ez zu schulden quaem, daz der obgenant herczzog Rudolf, unser vetter, abginge, und daz si der obgenanten lande ||
der Pfallencz und Beyern gewaltig wurden, und die ingenemen, daz wir dann uz denselben unsern vorgenanten landen und von derselben lande wegen den obgenanten unserm herren ||
frawen Annan, siner wirtinn, iren erben und nachkomen in iren landen, luten und herscheften, die si in der Pfallncz und ze Beyern haben, bi allen rechten und guten, ||
gewonheiten, da bi wir, den obgenanten unsern vettern herczog Rudolfen gelazzen haben, und in den er bi uns uncz an dise zit gesezzen ist ewiclichen lazzen wellen, und si zu denselben ||
rechten und gewonheiten getreulich und fruntlich schirmen und behalten, wer auch daz zwischen unsern obgenanten landen in der Pfallncz und ze Beyern amptluten, mannen und ||
dynern beidensiten dheinerlei auflauff oder zweiung entstunden, und man dieselben mit fruntschaft nicht versunen möhte, die sol man mit dem rechten uztragen, als in ||
den obgenanten landen in der Pfallencz und ze Beyern von alter recht und gewonlich gewesen ist. Mit urchund diczs brifes, besigelt mit unserm insigel, der geben ist ze Pazzaw nach||
Kristus gepurte driuzehen hundert iar und in dem drei und funfczzigistem jar an sant Allexius tage .