||
Wir Ulrich und Johans, gebruder lantgraven vom Leuchtinberge, entfelen, heizzen und gebie¬ ||
ten uch den burgern gemeinlich von Pegenicz und allen, die zu derselben stat und festen gehoren ||
und wonhaft doselbes sin, daz ir gemeinlich und besunder sullet globen hulden und sweren ||
recht und gewonlich gehorsamkeit erbeschaft und undertenikeit dem allirdurchluchtigistem ||
fursten, unsirm genedigen herren hern Karl, Romischem keiser, kunige zu Beheim, sinen erben ||
und nachkomen kunigen zu Beheim und der cronen desselben kungrichs und wem er ||
daz bevielet mit seinen offen briefen, und so schiere ir daz getan habet, so sagen wir uch, uwer ||
erben und nachkomen quit ledig und los allir eyde, globede und gehorsamkeit, domit ir ||
uns, unsern erben und nachkomen und der langrafschaft vom Leuchtenberge verbonden seit, ||
wann wir die stat und feste Pegenitz mit leuten, gut, gerichte und allen nutzen und ||
zugehorungen dem vorgenanten unsirm herren, seinen erben und nachkomen kunigen zu Be¬ ||
heim und der cronen desselben kungrichs recht und redelich verkauft haben, des zu ur¬ ||
kunde und ewiger stedikeit haben wir unsir insiegel an diesen brief gehangen, der geben ||
ist nach Cristus geburt druczenhundirt jar, dornach in dem syben und funftzigistem jar||
an sant Andreas abent des heiligen zwelfbotten .