Ich Albreht von Stravbingen, vergih vnd t/vn chvnt allen den, di disen gagenb/vrttigen brief :I ansehent oder horent lesen, daz mein vater, her Ott von Stravbingen, den siv Got genad, sin hof der ze Ra'teldorf avf der Laber gelegen ist, gab ze einem selgera't dvrch div liwe Gotes vnd dv(r)ch daz hail siner sel, dem spital meiner frawen sand Katherein ze Regenspurch, fvr ein vreiz, ledigez aigen mit diser bescheidenheit, daz man sin jarzeit alliv jar begen schol, an dem liehtmesse tag mit semeln vnd mit fleische, vnd mit trinchen vnder den s/ichen in dem vorgenanten spital ewichlichen. Mir het avch mein vater, her Otter, an demselben hof ze Ra'teldorf, behalten vnd avzgenomen div reht, daz ich des hofes stifta'r vnd enstifta'r wesen schold, vnd auch daz ich den chlaindienst in scholde nemen vnd haben, ich vnd alle mein erben, do vorht ich ez ch/om darzv von denselben rehten, daz meins vater jarzeit vergezzen vnd abgent w/urd; vnd han den spitala'rn in dem egenanten spital ze Regenspvrch verchavft alliv meiniv reht, div ich auf dem hof het, daz ich noch dehain mein erbe, noch afterchvnft, darnach dehain ansprach noch dehain reht nimer mer schvln haben noch gewinnen, vmb sibenczehen pfvnt Regenspvrga'r pfeningen, der si mich erleichen vnd schon gewert habent . Ich han den vorgenanten spitala'rn avch gehaizzen, daz ich in den vorgenanten hof versprechen vnd verantwurten schol, als aiegens reht ist, vnd dez landes gewonhait, an ainer ieslichen stat, da derselbe hof mit dem rehten an wirt gesprochen, an alle widerred vnd chriech; vnd ta't ich des niht, na'men si desselben dehain schaden, den schol ich in abt/vn vnd ablegen, an allen criech. Daz ez auch also sta't vnd (un)zerbrochen beleibe, von mir vnd von allen meinen erben vnd afterchomen, gib ich in ze einem vrchvnde disen brief mein selbes insigel versigelten. Des sint gezivge: her Chvnr(at) der Alburger von Geltolfingen, Artlieb von Pfa'ter, Eberhart an Pawenberga'r hof, Livpold der G/utchint, Heinrich der Amman von Pfa'ter, Friderich der chavfman , sin bruder Chvnrat von Allenlanden, Perhtolt der Amginger vnd anderr frvmer la'vt gen/vnch. Daz ist geschehen, do von Christes geb/urt waren drivtzehenhvndert jar darnach in dem sibenten jar an sand Georii tag dez heiligen martera'rs.