Ich Albreht der K/olner vergich vnd t/vn chuntt allen den, die disen gagenwurtigen prief ansehent oder ho'rent lesen, daz mir :I pr/uder Levpolt, der meister von dem spitol da cze Regenspurch, vnd dev gemeinschaft der pr/vder desselben gonuentes, darz/v getrauten, vnd nomen mich z/v einem pfleger vnd z/v einem trager /vber daz geriht da cze Sehouen, daz si chauften da cze hern Winharten von Chamerberch; vnd dazselbe gerihte ist lehen von meinen herren, den herczogen von paiern, herczog R/udolfen vnd herczog Ludweigen, voz den ez aufgabe her Winhart von Chamerberch, vnd ich ez von iren handen enpfie dem spitole ze tragen lauterleichen durch Got, an allen iren schaden, vnd swenn daz wa're, daz ich in darz/v niht enf/ugt ze einem rihter vnd z/v einem pfleger, vnd z/v einem trager /vber daz vorgenant gerihte da cze Sehouen, so schullen si vnd m/ugen auch einen andern an mein stat nemen z/v einem pfleger vnd zv einem trager, vnd zv einem rihter, des enschol noch enmage ich si niht geirren noch wider sein, swer in darz/v f/uget vnd auch gevellet, dor/vber ze einer sicherheit vnd z/v einem vrch/unde von mir vnd von meinen erben, vnd von allen meinen vreunden, daz die chein reht vnd chein ansproch dorauf haben noch gebinnen, gib ich in disen prief versigelt mit mein selbeg insigel. Daz ist geschehen do von Christes gep/urt woren tausent jar, drevhvndert jar vnd siben jar an dem svntage do man sanch jubilate deo.