Ich Gebhart der pfarraer vnd die purger derselben gemein von Gaymershaim, veriehen vnd t*vn chvnt :I allen den, die disen brief ansehent oder h/orent lesen, daz Charel von Chaersen sinen hof ze Tolling verchauft hat dem spital vnd dem conuent miner frawen sant Katrein ze Regenspurch vmb XXXVI lib. Regenspurger pfennig, der si gewert sint, bes*vcht vnd vnbes*vcht, ze holcze vnd ze velde, vnd auch ze dorf, vnd auch mit alle dem reht vnd zv dem hof ze Tolling geh/ort. Vnd derselb hof ze Tolling gilt alle iar driv schaff roken vnd driv schaff habern, vnd siben schilling Regenspurger pfennig, vnd einen meczen /oles, vnd zwainczich chaes oder zwainczich Regenspurger, vnd vier gens, vnd zehen h*vner, vnd hofstet die gelten viervndsechczich Regenspurger pfennig, vnd weiseid, vnd auch derselbe hof ze Tolling her gegewen ist, f/vr ein reht lediges aigen, so hat auch der vorgenant Charel ein chint, daz Agenes genant ist vnd daz sich verzeihen sol, swenne ez ze sinen iaren ch*umt; vnd derselben verzeihenvsse dez vorgenanten hof ze Tolling, ist porg her Perhtolt von Gaymershaim, vnd avch her Herman von Hessenhof, des vorgenanten Charelins sweher vnd Chvnrat Hermans pruder; vnd schulen gewer vnd avch porg sein alls aigens reht ist, vncz sich daz vorgenant chint verzeihe, vnd schvlen auch die vorgenanten laevte daz darzv pringen, daz sich daz vorgenant chint verzeich, dez vorgenanten hofes ze Tolling, an allen vnser schaden. Daz der chavff staet vnd vnzerprochen beleib, des ist zevch: her Hyltwein vnd sin svn her Vlrich von Ingolstat vnd Seyfrit von Geysenvelt, vnd mair Friderich von Gaimershaim, vnd Merbot des Schilhaers svn, vnd Heinrich der Ch*vn, Perchtolt Zaewisch, vnd Heinrich der Steinhausaer, vnd Werenher sein pruder, pede von Ingolstat, vnd Seyfrit der schreiber, vnd ander frumen laevt gen*vch. Diser brief ist gegewen da von Christes gep*urt waren drevczehenhvndert iar vnd in dem ahten iar an sant Michels tach.