Ich Hainrich der Sa'vmantel, purger von Amberch, verghi vnd tvn chvnt allen den, di disen gagebvrtigen prief ansehent :I oder horent lesen, daz ich durch di lib gotest vnd durch daz hail meiner sel ledichlichen han gegeben mein gechavftez aigen datz dem Reimoltshof dem spital datz Regenspurch meiner frawen sant Katherein, beshvtez vnd vnbeshvtez, ze holz vnd ze velde, ze wazer vnd ze stain, ze dorf vnd ze wisen, iepawen vnd vngepawen, mit allem dem, daz darzv geh/ort, doch mit so getaner beschaidenhait, daz der maister oder di phleger des egenant spitals von Regenspurch ewichlichen alle jar geben den sichen in irm spital an dem svnbenttag iedem d/vrftigen ainen phennich Regenspurger m/unz vnd ieder swester doselben zwen phenning vnd iedem prister in dem selben spital zwelf phenning. Man schol auch an vnser frawen tag ze der schidung aver idem dem sichen ainen Regenspurger phenninch geben vnd ieder swester, di den sichen dinent, zwen phenning geben vnd iedem prister zwelfe. Man schol auch an sant Johans tag ze weyhennaten aver iedem durftigen ainen phenninch Regenspurger m/vnz geben vnd isleicher swester zwen vnd islichem brister zwelfe. Auch so schol man in dem egenanten spital begen an der heiligen marterer tag, di da haizet di vier becronten oder quatuor coronatorum mein iarzit vnd liben hausfrawen vron Ch/vngund der got genad vnd aller miner voderen mit vigiln vnd mit selmessen vnd schol iedem sichen ain trinchen weins geben vnd ain rich von fleiss vnd idem sichen ain semlen vnd idem prister zwelf phenning vnd ider swester zwen phenning Regenspurger m/vnz. Swen wir aver di spitaler ze Regenspurch saevmich f/vnden, daz si ez allez nith volfurten als vorgesc[h]riben stet, so schol daz vorgesc[h]riben gut ze Reymoltshof ledich sein meinen erben, davon daz di pruder von dem egesc[h]riben spital nith habent volf/vrt vnd behalten, als si heten gelobt vnd in auch gesc[h]riben was. Daz daz allez also stet vnd [un]zebrochen beleib, han ich disen gagenb/vrtigen prief versigelt mit mein selbes insigel vnd mit der pvrger insigel von Amberch. Auch so sch/vlen noch enmvgen di egenanten spitaler von Regenspurch daz vorgesc[h]riben gut ze Reymoltshof nith verchavffen noch verwandeln von dem egenant spital noch von den d/vrftigen. Des sint gezevg her Chvnrat der pharrer von Amberch mein pruder, her Erkel von Castel, Pernhart sin sun, R/uger von Wollentshoven, Hainrich der Wollentshover, Chvnrat von Adratshavsen, Wolfel der Maentlaer, Alhart an dem marcht vnd ander frvmer levt genvnch. Daz ist geschehen, do von Cristes pvrt waren tavsen jar drevhvndert jar vnd zway jar an dem phingstag.