Ich Agnes von Paulstorf vergiech vnd t/vn chvnt allen den, die den brief ansehent oder h/orent :I lesen, daz ich mit verdachtem mut vnd mit gutem willen dvrch got vnd dvrch miner sael vnd aller miner vodern selhail willen han gegebn dem spital ze Regenspurch vnd den armen d/urfttigen vnd den siechen daselben vf die siechst/vben min zwen h/ofe datz Chr/vmpach nach minem tode v/ur ein lediges aigen vnd dieselben zwen hoef schulen gelten alle jar ein halbez schaf waeizzen, sehsse schaf habern, ein pfvnt Regenspurgaer pfenning an zehen pfenning, fvenf gensse, zehen h/vner, sehtzzehen cha'ise vnd siben schilling aier ewichlichen mit so getaner beschaidenhait, daz mines wirtes iarzeit vnd min iarzeit alle iar begen mit vigilii vnd mit selmesse vnd mit einem mol vnder den siechen, als verre div vorgenant gult der ee zwaier genanten hoef gelangen vnd geraichen mach, an daz si davon gebn muzzen ewichlichen an chriech vnd an widerrede, daz daz sta't vnd vnzebrochen ewichlichen beleibe, han ich in den brief gegebn versigelten mit minem insigel vnd mines s/vnes insigel, hern Heinriches von Paulstorf. Daz ist geschehen, do von Christes geb/urtte woren tausent jar drivhvndert jar vnd driv jar.