Ich Albreht von Lerchenuelt, vergih vnd t*un chvnnt allen den, di den brief ansehent oder h/orent lesen, daz ich :I verchauffet han mein eigen dacz Immentann vnd swaz darzv geh/oret, bes*uht vnd vnbesuht, ze velld vnd ze dorf, dem ersamen conuennt des goteshauses ze dem heiligen chra'utz ze Regenspurch f/ur ein lediges eigen an als vil, daz ich f/ur Perihten, mein tohter von der m*uter mich daz eigen anchomen was, ze porgen gesaczet han meinen vetern G/ozweinn den Walla'r vnd Ortliben den Purchsteter, swann min genant tohter ze iren jaren chvmt, daz si sich des benanten eigens gein dem conuennt des benanten goteshaus, lautterlich vnd ganczlich verzeihen sol an alle ansprach. Ich vergih ouch, daz diselben p/urgen gelobt habent dem conuennt des benanten goteshauses, swelhi notred dazselb goteshaus ange vmb daz benannt eigen dacz Immentann, daz si daz mitsampt mir dem benant conuennt auzrihten sch/ulen, als des lanndes vnd des eigens reht ist. Ta'ten wir des niht, swelhen schaden der benannt conuennt des n/am, den sch/ulen wir in abt*un, an allen seinen schaden; vnd wa'r der p/urgen einer niht, e sich Perht min tohter verzigen hab des eigens, vnd e daz sich verging des lanndes vnd des eigens reht, so sol vns der benannt conuennt oder ir amptla/ut manen vncz wir in einen andern seczen als gwissen. T/aten wir des niht, so sol ich vnd min p/urg ze Regens(purch) einvaren vnd schulen da lesten an gefa'rd, als lanng vncz wir in einen als g*uten an des toten stat geseczet haben. Vnd daz ditz also sta't vnd vnczerbrochen belib, gib ich in dar*vber disen brief versigelten mit meinem insigel vnd mit meiner p/urgen insigeln. Vnd des sint ziug: her G/ottz der Waller, her Hainr(ich) von Aw bei dem P/urhtor, her Herwikh von Aw, her Ortlip der Purchsteter, her Vlrich der Sallar, purgerscreba'r, her Hainrich der Schirlinger vnd ander mer ein michelteil. Daz ist geschehen do man zalt von Christes gep/urrt driutzehenhundert jar vnd in dem ahten jar darnach des pfinncztags nach sunwennten.