Wir abt Chunrat von gotes gnaden vnd div samnung ze Pr/ul veriehen mit disem brief, :I daz wir mit vnsers erba'rn herren bischof Chunrades von Regensburch willen vnd gunst haben verchouft vmb zehen pfunt Regensburger pfenn(ing) zwai schaf roken ja'rlicher g/ult nah leibgedinges reht, daz ain schaf swester J/vten der V/ulpeizzinne, daz ander swester Ch/ungunden der Geinchoua'rn, ittweder wan ze ir aines leib; vnd suln in div selben zwai schaf hincz Regensburch alle jar vor sand Egiden messe antw[u]rten an ir schaden, swenn wir des niht ent*un vnd swenn si vns manent, so suln wir oder swer nah vns abte ist vnd vnser prior so lange von chirchen sin, vncz wir si ir chornes verrihten. Vnd swenn ir aintwederiv niht enist, so si wir der andern wan aines schaffes suldich, ouch wan die weil si lebt. Darvber geb wir in disen brief mit vnsers erba'rn herren bischof Ch*unrades von Regensburch der obn geschriben ist, insigel vnd mit vnsern insigeln versigelten vnd mit den gezivgen die sint: her Vlrich der Leche, Chunrat G/urtelbeslaher, Ortlip Vulpeizz, Andre sin /oheim, Alhart Mosheimer vnd ander erba'r la'ut. Daz ist geschehen, do man zalt von Christes geb*urt drivzehenhundert jar darnah in dem ahten jar an sand Gregori tag.