Wir Ludowig von gots genaden, marggraf ze Brandenburch und ze Lusicz, pfallenczgraf ze Reyn vnd :I herczog in Peyern bechennen offenlich mit disen brief, das vns Heinrich der Hautzendorffer vnd ander erber ritter vnd knehtt chuntlich beweiset habent, das R/udel von Lebornstat die sache vnd handlung, die er gen .. dem spital ze Regenspurch vnd .. seinen pflegern hat, bisher vnredlich vnd wider reht vnd bescheidenheit furgeben vnd gehandelt hat, daz wir von rehts wegen billich furchomen vnd vndersten sullen, wellen vnd gebieten wir allen vnsern amptl/uten, hauptmannen, viczt/umen, pflegern, richtern vnd allen andern vnsern getrewen, das si im z*u denselben sachen furbas nihts geraten noch beholffen sein noch im vnd seinen helffern darzu in dehain weis z*ulegen; vnd swas er von derselben ansprach wegen des vorgen(anten) spitals n/utz vnd g/ult nidergelegt vnd verpoten hab, in welhem lantgeriht oder gericht das sei, die sullen dem obgen(anten) spital vnd seinen pflegern ane irrung vnd abganch volgen vnd gentzlich wider werden, wan wir ernstlich maynen vnd wellen, das er reht von dem vorgen(anten) spital vnd .. seinen pflegern voder vnd nem an den steten, da si billich ze reht sten sullen, des si im alle zeit gehorsam sind ze tunn vmb alle ansprach vnd vodrung, di er hintz in hat oder gehaben mag. Geben ze Regenspurch an aller heiligen abent nach Krists geburt dreuczehenhundert jar vnd in dem n/unvndvierczigstem jare.