Ich Ortlib der Sætzer, burger dacz Strawbing, tvn allen den chvnt, di disen prif ansehent :I vnt horent lesen, daz ich verriht pin minnechlichen vnt lipleich vm den chrig zwischen mein vnt dem maister von dem spital ze Regenspurch vm den wærd, der da ligt niderhalb der sychen ze Regenspurch, da ich einen leip an hete; vnt swen daz ist, daz si das svchent oder vodernt an mich, ob si meinen leip verendern oder verwæchzeln wellen, des sol ich niht wider sin vnt sol in vor meinem herren dem pischolf aufgeben an alle widerred. Diweil vnt daz niht geschehen ist, so sol ich des spitals trager sin des leips an allen schaden. Daz das gewiz vnt stet beleib, darvber han ich disen prif gegeben verinsigelt mit meinem insigel. Vnt des ist gezivge: der ersam ritter her Albreht der La'rchenvelder, her Fridrich der Regeldorfer, her Hainrich der richter vor pruk, her Chvnrat der Rechzer, ein Vlrich der Schvz von Stavf vnt ander get[re]wen vnt frumer levt genvg. Vnt daz ist geschehen, da von vnsers herren purt waz tavsent iar vnt drevhvndert jar an sent Barnabas tag.