Nos Baldewinus de Pærwing magister, consules ac universitas civium Ratispone universis tam presentibus :I quam futuris presentia inspecturis cupimus fore notum, quod Vlricus Setzarius, civis Ratisponensis pie memorie priusquam nature debitum persolvisset, premeditatus sana consciencia cum pleno consensu a) et favore filiorum suorum Ortlibi et Friderici ordinavit et disposuit hospitali sancte Katherine in pede pontis Ratisponensis et infirmis ibidem languentibus b) tres hubas in campo civium sitas, quarum hubarum una a magnifico domino Ottone duce Bawarie est conferenda et suscipienda tytulo feodali, quemadmodum a predicto domino Ottone duce Bawarie excellenti eandem hubam susceptam Fridericus Setzarius dicto hospitali et infirmis ibidem decumbentibus tantummodo portandam et non alio iure sibi nec Ortlibo fratri suo nec alicui alteri adtinentem pro suo tempore gessit fideliter et portavit. Ipso autem Friderico c) Setzario nunc defuncto Vlricus filius suus de manibus illustris domini nostri Ottonis ducis Bawarie eandem hubam suscepit sincerissime partitandam nullis suis usibus, sed sepe nominati hospitalis et infirmorum usibus atque iuribus attinentem. Relique vero due hube predictarum trium hubarum [...] d) Vlricus Setzarius a domino Prunone de Achkirchen pecunia propria comparavit. Ab ipso Vlrico Setzario ad dictum hospitale proprietatis iure possidende devenerunt. Pro tali autem donacione in dictis tribus hubis hospitali dicto et infirmis ibidem ab Vlrico Setzario exhibita et impensa, tenetur magister hospitalis Ratisponensis et conventus fratrum ibidem secundum ordinacionem ipsius Setzarii omnibus infirmis dicti hospitalis cervisiam singulis annis et diebus singulis a carnisprivio usque ad festum paschatis ministrare. Deinde vero a festo paschatis usque ad festum sancti Michahelis, qualibet septimana duas urnas cervisie pro remedio et pro commemoracione anime Vlrici Setzarii defuncti porrigere non obmittant, quod si dicti hospitalis magister et conventus aliquo tempore dictorum terminorum neglexerint adimplere, ex tunc redditus dictarum hubarum, qui solvuntur eodem anno canonicis veteris cappelle aput Ratisponem cedunt et eveniunt pleno iure. In cuius rei testimonium presentem prelibato hospitalis magistro et hospitali sepedicto dedimus litteram sigilli nostre universitatis et annotacione testium, scilicet consulum iuratorum robore conmunitam et sunt hii: dominus Paldewinus magister civium dictus de Parbing, dominus Karolus Pragarius, dominus Heinricus de Awe, Fridericus Weintingarius, Otto Wollarius camerarius, Otto Wollarius in Hayda, Albertus Gemglingnarius, Vlricus Tvendorfferius, Hainricus ante Vrbem, Haymo inter Latinos, Cȅnipertus, Heinricus de Ingolstat, Leutwinus, Hiltprandus, Waltherus Nwnburgær, Wernherus super Danubium. Actum anno domini Mo trecentessimo tercio e) in die martyrum Marci et Marcelliani. e)