Ich Marquart der chorherre von send Johanne, maister der ahte brvderschefte ze Regenspurch :I tvn chvnt allen den, die disen brief ansehent oder horent lesen, daz ein chrieck was zwischen der brvderschaft von dem T*vme vnd hern Chvnrades des Ha'vbla'res chinden vmb ein hvs in der Schefta'rstrazze, daz schvf her Pernolt der Ha'vbla'r, der ovch chorherre dacz send Johannes was der brvderschaft hincz dem T*vme, also daz si von dem zinse desselben h*vses ewichlich alle iar sin iargezit begiengen mit messen, mit chertzen, mit alm*vsen geben in daz spital datz send Katherine, als ez an dem salbvche der brvderschefte von dem Tvme geschriben vnd bescheiden ist. Derselbe chrieck wart also vor herm Chvnrade dem Zande, dem sch*vltheizzen vnd gewaltigem richta'r verscheiden, daz man hern Chvnrades des Ha'vbla'res chinden gap fvnf pfvnt Regenspurger pfenning, darzv stvnt ez ze ratschatz vnd dem rihta're wol zwelf schilling pfenning. Derselben pfenning gap brvder Chvnrat von Pilstingel, der siechmaister der d/vrftigen pfenning wan driv pfvnt mit der bescheidenheit, daz der brvderschefte maister von dem T*vm alle iar ze derselben iarzit sol geben, wan den edvrftigen vmb gela'bde, des si allerbeste bed/vrfen, ein pfvnt Regenspurger pfenning minner aht pfenning von dem zinse des vorgenanten h*vses, so man iz von demselben zinse ga'nclich gehaben mac. Gieng aber des zinses von dem hvse iht ab, swenne daz gescha'he, so gieng einem pfenning ab sam dem andern an allen den steten, da desselben zinses iht hingeschafft ist. Ez sol ovch daz vorgenante gela'bde der tot edvrftigen vnd siechen chovffen vnd verrihten brvder Chvnrat von Pilstingel der siechmaister oder der, der denne an siner stat siechmaister ist. Daz in daz also sta't vnd vnzebrochen beleibe vnd ovch also volf/vrt werd, darvber han ich in disen brief gegeben, besta'tigt vnd verinsigelt mit der gemeine insigel der ahte brvderscheftte. Des sint gezivg, die maister der brvderschefte: her Otte der chorherre vnd maister datz alten Chappel, her Nycola der chorherre vnd maister datz send Johanne, her Heinrich von Peirching, her Heinrich von Sch/vtenhoven, die chapplan des spitals, Perhtolt der maister von send Heimeram, Chvnrat der Pernhartzh*vsa'r, maister von send Vlriche, Chvnrat der Ha'rtinger, maister von Obermvnster, Perhtolt der La'vbla'r, maister von Nidermvnster, Chvnrat der Pfister, maister von send Pauls, Chvnrat der Napurger, der aht brvderschefte schriba'r, Friderich der nachmaister von dem T*vm vnd noch mer frvmer vnd gela'vphaftiger l/vte. Ditz ist geschehen, do von vnsers herren geb/vrte waren drivzehenhvndert iar darnach in dem andern iar an send Benedicten tag des heiligen aptes vnd bihtiga'res.