Ich Bertholt der Grevl von Havgoltspach vergih offenlich an disem brief, :I daz ich den spitalærn von Regensp*vrch, gelten sol zwainzik pf*vnt Regensp*vrger pfenning, di si mir gelihen habnt vnd von denselben pfenning di weil si vnvergolten sint, sol ich in alle iar geben als vil der hof datz Groselving dinstes giltet an dem halftentail von rokken vnd von hobern vnd darz*v sehzik pfenning Regensp*urger, vnd swo ich hevt oder morgen niht en bin, so s/vln minev chint von denselben pfenning, ob si dannoch niht vergolten sint, alle iar avch diselben g/vlt geben als vorgenant ist di weil si dev zwainzik pf*vnt inne habnt. Avch han ich vnd minev kint di wal alle iar, daz wir in di vorgenanten pfenning swenne wir si gehabn m/vgen ze lihtmesse s/vln geben vnd s/vln si di nemmen an chriech, vnd s/vl wir danne ledich sin des dinsts. Dar/vber han ich in geben den brief ze einem /vrch/vnde, der warde geschribn vnd geben da von Christes geb/vrt warn tavsent iar, drivhvndert iar vnd ein iar.