Ich Jordan der Zenga'r tun chvnt allen, di disen brief ansehent oder horent lesen, :I daz ich vnd mein br/uder, der Fridreich vnd der Hainreich, div Vogtai auf dem hof ze D/vra'storf dem spital ze Regensburch ze rechtem aigen verchauft haben, vnd sulen ir geweren auch an einer iesleichen stet sein, ob si dehainen chriech davon geb/unnen, so s/ul wir ez versten als aigens reht ist. Wir haben auch in gehaizen f/vr vnser ivnge br/uder, den Prentlein vnd den Churaden, daz si nach der vorgenanten vogtai, chlain noch groz, iht ze sprechen haben. Daz ez also sta't vnd vnzebrochen beleibe als ez vor geschriben stat, des gib ich in ze vrch/vnde disen brief vnder hern Hainreiches von Geigant, des rihta'r von Nevnburch insigelt, vnd gib in auch ze zivge: hern Meinhart, den pfarra'r von Swartzhofen; sein zwen gesellen, den Raspen, den Luipolt; hern R/udger von Warperch; Ha[in]reich den Zenga'r; Ortliwen den Zenga'r; Hainreichen den Cholen; Reimboden den Cholen; Hainreichen von Ma'uschendorf; Hermannen den Rehtza'r; di alle dabi waren da wir div vogtai aufgaben. Dirre brief ist geschriben, do von Christes geburt waren driuczehenhundert iar vnd darnach in dem f/vnften iar an sand Antoni tag.