Ich Heinr(eich) der Zenger von Swartzenekke vergich vnd tun chvnt allen den, di disen brief ansehent oder h/orent lesen, daz :I vnser liber vater Ott der Zenger, dem Got genad anda'ltichlichen an hat gesehen den chvmber vnd den smertzen der armen d/vrftigen in dem spital meiner frawen sant Katrein an dem fuezze der bruege ze Regenspurch, vnd gab in vnd dem hause ze stiur vnd ze f/vdrunge, vnd auch ze hail vnd ze trost sin sel auf einen mairhof ze Katzpach, alle iar ein mez rokken desselben mezzes sint aht ahtail Nappurger mazzes; vnd schol auch diselben g/vlte ab demselben hof nemmen div weil div werlt vnd auch daz vorgenant haus stet, vnd schol man imz auch an allez geva'rde geben, wann iz mit meinem willen vnd auch Ortliwes, meines bruder geschach vnd auch immer vnser wille wesen schol, sunderleich daz meiniv kint vnd alle mein afterchvnft vnd auch meines bruder Ortliwes afterchvnft noch ander minan darauf niht gesprechen m/vg, noch daz vorgenant haus m/vg geirren mit dehainer slaht, chrieg oder irresalung, gib ich im disen brief mit meinem insigel versigelt. Ich gib im auch ze ziug darvber: hern Hainr(eich) von Geigant, den rihter ze Nevnberch; mein bruder Ortliwen; den Hainr(eich) den Zenger von Murach; den Hainr(eich) den Stadla'r; R/udgern den Rehtza'r; Hermanne den Rehtzer; Hainr(eich) den Niunmarchter; vnsern liben diner den Wernlein. Dirre brief ist geschriben do von Christes geburtt waren driutzehenh/undert iar darnach in dem f/vnften iar des freitasges vor dem svntage oculi mei semper.