Nos Wilhalmus dei gratia abbas totusque conventus monasterii sancti Viti in PrȄl constare :I volumus universis presencia inspecturis, quod receptis a magistro et fratribus hospitalis Ratisponensis XVI libras denariorum Ratisponensium in peccunia numerata, quas etiam in evidentem monasterii nostri utilitatem convertimus, videlicet iudicium cum advocacia curie nostre in Prukk, que Sighardus et Karulus, Germani et filii quondam Sighardi de Eglolfshaim a Ratisponense ecclesia in feodum tenebant, ab eisdem reservata ipsis reemendi seu recuperandi facultate, prout in alio instrumento super eodem contractu facto patet plenius conparando. Eisdem, videlicet fratribus et hospitali, agros quosdam ad XIIII iugera communiter estimatos, qui eidem curie nostre in Prukk attinebant, sitos circa curiam ipsius hospitalis, que dicitur Ævhaim, vendidimus ac tradidimus pro dictis XVI libris denariorum, quorum etiam agrorum nos eiusdem hospitalis auctores, quod vulgariter gwer dicitur, sumus et constituimus ac esse tenebimur ab eisdem hospitalariis libere et sub proprietatis tytulo possidendos, venerabilis patris et domini nostri Chvnradi Ratisponensis episcopi consensu utrumque et beneplacito accedente; etiam quia iura iudicii ac advocacie premisse in ipsa curia nostra Prukk tam, quo ad ipsum dominum episcopum seu ecclesiam Ratisponensem utpote propter verum et directum dominium, quod in iudicio et advocacia predictis competit eisdem, quam etiam quo ad nominatos Eglolfshamerios utpote feodatarios et vasallos ex distractione et vendicione huiusmodi agrorum diminui videbantur. Nos abbas et conventus feodum, quod vulgariter scheriglehen dicitur, ipsi curie nostre in Prukk proprietatis titulo attinens a iuribus autem iudicii et advocacie pretacte omnino exclusum in refusionem et recompensacionem dictorum agrorum ex nunc attribuimus et coniungimus curie supradicte. Ita ut exnunc et in casu reempcionis iudicii et advocaciam premissam idem feodum decetero eisdem iuribus inseperabiliter annexum esse debeat et coniunctum prenominati vero agri quocumque casu contingente deinceps in nullo iudicium et advocaciam premissam respicient, immo apud predictos fratres hospitalarios libere et sub proprietatis tytulo perpetuo remanebunt. In cuius rei testimonium presentes damus litteras dicti domini nostri episcopi nostrique videlicet abbatis et conventus sigillorum munimine roboratas. Datum Ratispone anno domini millesimo CCCo primo, V. kal. maii.