Ich Hartlieb von Gezsolting, vergich vnd tuen chvnt allen den, die disen brief ansehent oder horent lesen, daz ich ze chauffen han gegeben dem spital ze Regen(spurch) an dem fuezz der prukk, mein aigen gelegen dacz Ettenchofen pei der Aitrach, besuecht vnd vnbesuecht, gepawen vnd vnpawn, ze holtz, ze veld vnd ze dorffe vmb viervndzwainzich pfunt Regen(spurger) pfenning, der ich gewert pin ga'ntzlich vnd gar an allen presten, vnd sol demselben spital vnd den, die darz/u gehorent, daz vorgenant aigen versten vnd versprechen, als aigene recht ist, an aller der stat da in dazselb aigen ze chrieg oder ansprach ich wurd, vnd darzu han ich in ze porgen gesetzt zu mir, Chvnr(at) den Menchoffa'r, vnuerschaidenlichen, ob ich dez nicht enta't, swelhen schaden dez daz vorgenant spital vnd die darz/u gehorent na'men, den sol ich vnd mein vorgenant porge ab tuen, ga'nczlich an alle widerred. Sich hat auch mair Charel, sein hausfrawe vnd all sein erben aller der recht vnd aller der ansprach verzigen, der si an dem ofte genanten g/ut heten, daz si furpas nymmer mer dhein ansprach darauf haben. Vnd dez sint zeuge: Chvnr(at) der Aigelchoffer, Heinr(eich) der (Girll ?), Heinr(eich) der Schirlinga'r, Chunr(at) der Kinchoffa'r, Chunr(at) von Dingolfing, der chirichsteta'r, der trost, der prancz, der chadel, der Gebhart, Dietreich von (Renspach ?) hofmaister von Ilpach, Teinhart dez Gozseltingerz chnecht. Vnd daz daz also st/at beleib vnd vnzerbrochen, gib ich in disen brief versigelten mit meinem insigel vnd mit meinz porgen insigel. Der brief ist gegeben, do man von Christes gep/urt zalt dreuzehenhundert iar vnd ainlef iar an sant Thomas abent.