Ich Albrecht von Satelpogen, gnand der Gla'sel, miner herren pflega'r vnd rihta'r ze Regenstauf, herczog R/udolfez vnd herzog Lvdbiges, vergieh offenbar an disem prief allen den, die in sehent oder h/orent lesen, daz mir gewalt gegeben het miner herren vitztvm, her Albreht der Nothafte, ze rihten zwischen dem probst Bima'rn von seint Mang vnd ver Ma'hthilden von F/uzzenberch, do ver Ma'hthilt den probst Bimar vnd daz gotzhaus von seint Mang vmb ansprach vnd chomen dez pedenthalben auf reht, der probst Bimar von seint Mang vn ver Ma'hthilt von F/uzzenberch, vnd pot der probst von seint Mang sinen geweren dezselben g/utes, der wart im ertailt ze stellen ze vierzehen tagen, nach den vierzehen tagen braht der probst von seint Mang sinen geweren auf reht vnd wolt in gestellet haben als im ertailt waz. Nv sohen beidenthalben ir herren vnd ir frevnt den chrich niht geren, vnd lizzen den bedenthalben ze durchsla'ht an den erba'rigen herren hern Heinrichen von Ernvelz, der dez g/utes emaln rehter lehen herre waz vnd schiet er mit peder (teil ?) gunst vnd willen daz aller chrich vnd alleu ansprach ze durchsla'ht ab wa'r den, den vorgenant Mahthilt von Fuezzenberch hintz dem vorgenanten g/ut ze Fuezzenberch het vnd ir der probst von seint Mang von dem gotzhaus geben scholt zwelf schilling Regens(purger) pfening, der er si gewert hat an allen bresten vnd darvmb verzech sich ver Ma'thilt von Fuezzenberch aller ansprach vnd als des rehten dez si ver iach hincz dem vorgenanten g/ut ze Fuezzenberch vnd gab daz auf in dez erba'rigen herren hant hern Heinriches von Ernvels, von dem si dez g/ut ze lehen iach, den pat der probst von seint Mang im vnd dem gotzhaus, dirre gerihten sach, einen prief ze geben, der water im ertailt mit volge vnd mit vrtaile. Vnd daz daz sta't vnd vnzerprochen weleib, darvber gib ich dem probst vnd dem gotzhauz von seint Mang disen brief versigelt vnder des erba'rigen herren insigel, hern Heinriches von Ernvels, wan si des pedenthalben gerten, vnd vnder minem insigel. Vnd des sint zeug: her Ott von dem hof, Jvrdan von Viehouen, Albreht von Viehoven vnd ander fr/vmer laut vid. Daz ist geschehen do von Christes gepurd ergangen waen tausent iar drevhvndert iar darnach in dem XIIIo iar an sant Anne tach.