Nycolaus dei gratia ecclesie Ratisponen(sis) electus et confirmatus, universis abbatibus, prepositis, decanis, plebanis, viceplebanis et aliis :I ecclesiarum rectoribus eiusdem dyocesis salutem in domino sempiternam. Innotuit nobis, quod quidam ex vobis dilectos in Christo fratres hospitalis nostri Ratispone, cuius promociones favore prosequimur speciali, ad vos pro colligendis elemosinis venientes occasione aliorum collectorum seu petencium interdum repellere et admittere contradicunt, vel si quando admissi fuerint, tam per vos quam ecclesiarum vestrarum procuratores, qui Zehmaister vulgariter nuncupantur, immoderata porcio requiritur et recipitur ab eisdem. Quare vobis universis et singulis in virtute sancte obediencie et sub pena suspensionis officiorum precipimus firmiter et districte, quatenus non obstante qualibet suspensione collectionis elemosinarum, quocumque tempore per nos aut antecessores nostros facta vel facienda, seu eciam quolibet petente exceptis nunciis nostre kathedralis ecclesie, quos omnibus aliis preferri volumus ipsos fratres de cetero, quotiens ad vos venerint, admittere in suis peticionibus debeatis, nec eciam collectarum per eos elemosinarum aliquam recipiatis, vel per dictos procuratores permittatis recipi portionem nisi de ipsorum fratrum bona et spontaneaa voluntate vobis vel eisdem aliquis fuerit erogatum. Si vero dicti Zehmaistri desistere noluerint a requisicione huiusmodi elemosinarum seu porcionum earundem, eos ad hoc per subtractionemb divinorum per vos compelli volumus et artaric. Prefatum enim hospitale per vos tanto maiori diligencia diligimus et petimus in suis negociis omni tempore promoveri, quanto eisdem fortior incumbit necessitas ex multitudine qua frequenter deprimitur(?) infirmorum. Nos etiam omnibus vere penitentibus et contricis, qui predicti hospitalis infirmis suas elemosinas dederint quadraginta dies iniuncte sibi penitencie misericorditer in domino relaxamus. Ratas et gratas habentes indulgencias alias a quibuscumque dominis archiepiscopis seu episcopis predictorum infirmorum benefactoribus traditas et concessas presentibus a data earum ad duos annos continuos et non amplius valituris. Dat. Ratispone anno domini millesimo trecentesimo terciodecimo, in crastino beati Bartholomei apostoli.