Wir Wernhart vnd Heinrich von gottes gnaden grafen von Lensperch, veriehen vnd t/vn chvnt allen :I den, die disen gagenbvrtigen brief ansehent oder horent lesen, daz wir durch vnserr sael hail vnd aller vnser fodern sel hail willen haben lazzen div lehenschaft vnd alles reht an dem g/ut vnd an dem hof, datz Lauterchofen miner frowen sand Kathrein, ze einem lobe vnd ze einen eren, vnd den armen siechen in dem spital ze Regenspurch an dem fuezze der pr/ukke daselben, ze einer guten f/udervng, daz vnser lieber bruder, graf Pernger, dem Got gegnade, von Frideriches Pett, von G/vtting, der ez von vns gelehen het, dem vorgenantem spital geaigent het, vnd aigent an vnser gvnst, wizzen vnd rat, esv wellem wir durch Got lauterlichen, divselben lehenschaft, div vns zercht angehort, an dem vorgenantem g/ut, dem eegeschriben spital ze Regensp/urch verchern vnd verwandeln; vnd vercherns vnd verwandelens mit dem brief, ze ainem rehten aigen, mit der beschaidenhait, daz daz vorgenant spital den vorgeschriben hof, daz Lauterchofen, besuhten vnd vnbesuhten, gebavten vnd vngebavten, ze veld vnd ze dorf, schulen haben vnd besiczzen ewichlichen mit allem daz darz/v gehort f/vr ein rehtes aigen, also daz wir noch chain vnser erbe noch chain vnser nachomen schulen chain reht daran haben oder nimmer mer darran gewinnen. Ouch so hab wir den eegenanten spitala'rn von Regensp/urch geaigent mit allem reht, daz g/ut vnd den hof, daz Seyfridstorf, besuhten vnd vnbesuhten, als den vodern hof, den in ouch vnser lieber bruder, graf Pernger geaigent het; vnd wellen si furbaz niemer mer an den zwain eegenanten gvten geirren oder wider sein, mit chlain noch mit groz, vnd allez gefa'rd gan dem eegeschriben spital vermeiden, vnd wellen siv furbaz nimer mer beschirmen, versprechen vnd f/urdern an den zwain guten vnd an aller stat, da wir siv gefudern m/ugen vnd chvnnen, mit worten vnd mit werchen, mit gantzen trwen. Daz daz also staet vnd vnzebrochen beleib, von vns vnd von vnsern nachomen, hab wir in den brief gegeben, versigelten mit vnsern insigeln. Des sint gezwge: Chvnrat der Eybeche, rihtter ze Dingnolfing, derselben sache schiedman vnd taidingaer: Heinrich von Chvmgesawer; Chvnrat der Ene von Leibolfing; Friderich, Perngers s/vn von Frontenhausen; Albreht der Prantzze; Chvnrat der Trost; Gebhard, pvriga'r ze Dingnolfing,; Chvnrat der Pirhaimer; Rupreht der schulmayster ze Dingnolfing; Heinrich der schreiba'r von dem spital ze Regensburch, vnd ander frumer la'vt ein michelteil. Daz ist geschehen do von Christes gebvrtte woren drwzehenhvndert jar vnd in dem vierdem jar des mikken in der pfinstwochen.