Dem houchebornen forsten usem heren hern Primisslaw, hertoghen to Teschin unde to Gelzow, hofgherichter des allerdorchlutigesten forsten unde heren heren Wentzlawes, Romischen konighes, to allen tiden merer des rikes unde konighes to Bemen, enbede we de borghermester, rad unde de borgher ghemenliken der stad to Hildensem usen willegen underdenighen denst. Gnedighe forste unde here, we senden to juwen unde des houfgherichtes gnaden twene unser radmann, Bertolde Luremanne und Corde Styme, mit vuller unde gantzer ghewalt as to verantwordende teghen dem houchebornen forsten unde heren hern Wentzlow, hartoghen to Sassen unde Lunenborch, unde umme alle dat, dat we to claghende unde to deghedinghende hebben vor dem houfgherichte. Des hebbe we unse vorghenanten radmanne mit vuller unde gantzer ghewalt to ghewinne unde to vorlust use ghewalt bevolen, use claghe in enes anderen hand to settende as to vorwesende, ghelikerwis also we gegenwordich werenn, gherichte. Des to ener waren sekerheyt, so sende we juwe dessen openen bref beseghelt mit user stad to Hildensem anhanghende inghesegele, de geven is to Hildensem na goddes bord Driteynhundert jar in deme sevenundeachtentigesten jar, in sunte Ghorgonius dage.