Wy de rad der stadt tho Hildesem bekennen openbar in dussem breve vor uns, unse nakomen unnd alsweme, dath wy von den kindern Cordt Ludeken des eldern zelliger tho Alvelde tweihundert und vifunndtwintich gude fulwichtige Rinsche goltgulden tho der genoge upgeborth unnd entfangen hebben und de forth in unse unnd unser gemeinen stadt nutt unnd fromen witligen ahngewant unnd gekarth. Hirvor hebben wy gemelten kindern Cordt Ludeken des eldern zelliger, orhen erven edder dem truwen holder dusses breves mitt orhem guden willen uth unser stadt redesten upkomen unnd renthen vorkofft negen gude fulwichtige Rinsche goltgulden ader yo sovele munthe, darmitt mhen einen idern goltgulden ganckbarliges bekomen mach, jerliges tinßes tinßes, de wy onhen plichtig sin tho gevende, de helffte uppe Michaelis dage unnd de andern helffte uppe Passchen, beredeligen alle tidtt. Aver eyn ider hefft seck de gnade und macht vorbeholden, dath ein dem andern in den achte dagen tho Winachten de lose unnd wedderkop dusses vorbenomden tinses kundigen mogen, unnd wellichs jars dath gescheige, denne darnha tho dem erstkomende Passchen syndt wy unnd unse nakomen von unßer stadt wegen den vorgeschreven tins vor tweihundert unnd vifunndtwintich gude fulwichtige Rinsche goltgulden mith allen bedageden vorsethen tinsen, yfft der ichteswelks hinderstellich unnd uhnbetaltt weren, plichtig wedder to kopende anhe weddersprake, argelist und geferde. Tho orkunde hebben wy unser stadt ingesegel witligen gehengt an dussen breif, na goddes borth Voftheinhundert vifunndvoftich jar, des dinxstages in den Ostern.