Ek Hans Eckhagen bekenne openbare in dussem breve vor mek, myne erven unde alseweme, so ek gekofft hebbe eynen meygerhoff to Westem belegen, den itsundes buwet unde fruchtiget Tylke Amelunges, myt alle syner rechticheid unde tobehoringe in holte, in velde, water, wisken unde weyde, van dem ersamen Dyderke van Reden unde synen erven mek unde mynen erven unde dem edder den, de den breff, de van dem erwerdigen in god vader unde heren, hern Hinreke bisschuppe to Minden unde proveste sunte Mauricius kerken uppe dem berge vor Hildensem unde dem vorbenomden Dyderke van Reden vorsegelt hebben, hebben myt unsem wylden. So hefft de gestrenge Ludolff van Nette mek mek gegeven unde betalt sestich gude Rinssche gulden, dar vor stade ek unde myne erven dem erbenomden Ludolffe van Nette unde synen erven effte holder dusses breves myt orem guden wyllen to dem vorscrevenen meygerhove myt alle syner tobehoringe unde hebbe overgeantwordet unde antworde one over in dussem breve des vorbenomden Dyderkes van Reden breff, den he mek darover gegeven unde vorsegelt hefft. Sodann breff hefft he myt mynem guden wyllen ane myne weddersprake, des van myner wegen unde in myne stede to brukende unde mede to manende vullenkomen gelick mek myt aller rechticheit unde fryheit, so ek dat suß lange gehad hebbe, sunder myn edder myner erven effte jemandes van unser wegen hinder edder insage. Dusses to vorder orkunde unde bekantnisse hebbe ek Hans Eckhagen vorbenomd vor mek unde myne erven myn ingesegel witliken an dussen breff gehenget, na goddes bort Veerteynhundert darna in dem negenundenegentigesten jare, ame mytweken na dem hilgen Palmedage.